Semaya Dr M semina dikena nginti undi

SAMARAHAN: Kepala Menteri Datuk Patinggi Abang Johari Tun Openg netapka semaya Chairman Pakatan Harapan(PH) Tun Dr. Mahathir ti deka meri 20 peratus asil minyak ngagai Sarawak dikena nginti undi rayat.

AbangJoharikemegaChairman Barisan Nasional(BN) Nengeri madah Dr. Mahathir patut meri 20 peratus nya dalam timpuh 22 taun iya nyadi menteri besai.

“Pagi tu tadi aku bisi macha berita iya( Dr. Mahathir) besemaya deka meri 50 peratus ari asil chukai ngagai Sarawak.

“Dulu agi ari tu, iya udah besemaya deka meri 20 peratus ari asil minyak ngagai Sarawak.

“Diatu baru deka meri, lapa enda dalam timpuh 22 taun suba,”ku Abang Johari ba pengerami nyuaka ‘Sijil Tad- bir Urus Desa Infra-UniKL, di Unimas sehari tu.

Pengerami ke bela digulu Sapit kepala Menteri Datuk Amar Douglas Uggah nya matak urung 1,100 iku bala TR/KK ari Pelilih Kuching, Bau, Lundu, Serian, Simunjan, Tebedu, Lubok Antu enggau Betong

Nyangkal tuduh Dr. Mahathir ti madah orang Sarawak balat kepapas, lubah sereta kelalah, Abang Johari netapka Dr. Mahathir ke endar iya siku ketuai ke kelalah.

“Baka ni iya tau nuduh orang Sarawak kelalah. Peranak Sarawak ngiga jereki nyentuk ke menua Timur Tengah, gawa ba industri minyak.

“Ke amat kelalah iya empu, kelalah ngelawa Sarawak. Enti iya enda kelalah, Jalai Besai Pan Borneo lama udah tembu digaga,”tandu Abang Johari.

Abang Johari madah, timpuh 22 taun ukai timpuh ke pandak lalu ukai baka ke 2 taun.

Asil minyak kitai diempu iya dalam timpuh nya lalu diatu deka meri 20 peratus ngagai Sarawak ketegal ti dekaka undi rayat, tandu Abang Johari.

Berindik enggau nya, Abang Johari ngelalau semua 1,100 ketuai bansa ke datai ngulu program nya berunding enggau manah ba sentang bagi ketuai ti deka dipilih.

Iya madah Menteri Besai ke diatu, iya nya Datuk Seri Najib Tun Razak nyamai dibai berunding lalu seruran mendingka pinta Sarawak.

“Aku pechaya Najib deka ngamatka semaya iya ba sentang Sempekat Malaysia 1963(MA63). Enti enda aku empu deka ngiga Najib,’ku Abang Johari.