KKLW bisi nyendiaka latih ‘Sijil Tadbir Urus Desa’ ngagai ketuai bansa, JKKK
KUCHING: Perintah nengah Opis Menteri Pemansang Menua Pesisir enggau Kandang Menua(KKLW) nyendia latih ngagai ketuai bansa sereta peranak menua pesisir nengah program ‘Sijil Tadbir Urus Desa’.
Sapit Menteri KKLW Datuk Alexander Nanta Linggi madah, program latih nya diungkup ngagai raban dalam Komiti Pemansang enggau Pengelikun Genturung Pendiau (JKKK).
Ku iya, program diatur enggau tuju ngangkatka pengelandik raban pesereta (JKKK) ba sentang chara bejalaika tusun pengawa tetiap genturung pendiau tauka rumah panjai.
“Ungkup Zon Sarawak, program tu mungkur raban ketuai bansa di serata Sarawak.
“Program nyadi inisiatif perintah ti keran deka ngemansang modal mensia kelebih agi ba institusyen JKKK.
“Nengah latih tu, dikearap ulih nambah pengelandik raban ketuai bejalaika tusun pengawa sida ba rumah panjai ngambika semua pengawa dikemujur enggau manah,’ku Nanta.
Iya mansutka penerang nya ba jaku pengelalu program nyuaka “Sijil Tadbir Urus Desa Infra-UniKL Zon Sarawak ke diatur di DeTAR Putra Universiti Malaysia Sarawak(Unimas) ditu.
Pengawa nutup program nya dikemujur Kepala Menteri Datuk Patinggi Abang Johari Tun Openg.
Sepenyampau 1,100 iku bala ketuai bansa ari Pelilih Kuching, Bau, Lundu, Serian, Simunjan, Tebedu, Lubok Antu enggau Betong datai ngulu kus berengkah 10 nyen- tuk ngagai 12 April nya.
Nitihka penerang Nanta, kenyau ari taun 2017 nyentuk ngagai bulan Mac 2018, penyampau 1,955 iku pesereta ti ngarika raban ketuai bansa (tuai rumah) di serata Sarawak udah ngulu kus.
Ku iya, lima modul program dikemansang nengah kerejasama Infra enggau Universiti Kuala Lumpir(UniKL) iya nya tusun pengawa genturung pendiau, tusun pengawa pekara wang, chara dagang, chara matau projek sereta tanggungpengawa nyadi pemantu pengerijista pengundi.
Modul program mungkur semua pekara lalu ulih nambah pengelandik ba atur nentuka kuing genturung pendiau ngagai ikas profesional nengah penau enggau pengelandik ikas tinggi, tandu Nanta.