Lebih 100 ejensi perintah deka nyereta Fiesta NBOS di Sarikei

SARIKEI: Lebih 100 ejensi perintah deka nyereta Fiesta Strategi Tasik Biru Nasional (NBOS) diatur di Balai Suarah Sarikei kena 13 ngagai 15 April (Hari Lima ngagai Hari Minggu) tu.

Batang tuju Fiesta NBOS mantaika penemu NBOS ti dipejalaika perintah ngagai rayat di menua nya sereta mandangka pemujur enggau pemesai pangka pejalai program NBOS.

Pia mega deka nyediaka awak ngagai peranak menua nya ngaul diri ba program NBOS.

Nangkan nya, mega ngemai servis ejensi perintah ngagai rayat kelebih agi menua pesisir, meri awak rayat ngaul diri semak enggau bala ketuai seraya ngelancharka insiatif pemadu baru ngena konsep NBOS.

Nyerumba Fiesta NBOS, Opis Menteri Wang mega deka nyuaka replika chek enggau pemeri barang dikena ninting hari ngagai 100 ruang bilik seranta ti diarika empat penerima.

Kelimpah ari nya, pengawa nyuaka bantu belanja dikena melanja aktiviti lima gempung ukai dikuasa perintah (NGO), pengawa nyuaka Temporary Occupation Licence ( TOL) ngagai tiga genturung pendiau, sereta pengawa nyuaka bantu Kumpulan Wang Amanah Pelajar Miskin (KWAPM).

Pengawa nyuaka Surat Chiri Ketuai Raban Bansa Bagai Menua Sarikei, pengawa nyuaka Replika Chek ari raban SEDC ngagai pedagang di baruh Program Pemansang Dagang Kotej mega deka diatur.

Kepala Menteri Datuk Patinggi Abang Johari dipelaba deka bejadi Pengawa Muka Fiesta NBOS kena Hari Enam, 14 April, urung pukul 9 pagi.

Pengerami mega deka dirichah bemacham atur pengawa bukai nyengkaum senam aerobik, berapi, karaoke, pekit seni enggau budaya, pengawa mandang, pengawa bejual ari bala komuniti, pengawa ngelakuka produk enggau agro bazar.