Sida milih siku orang ti diperati nyadi ‘pemunas’ ba mayuh isu besai ti mangka menua
KUCHING: Gempung penyakal udah milih pengiring ti salah ungkup Pengawa Bepilih Besai Ke-14 (PRU14) laban orang ke dipilih sida diperati nyadi ‘pemunas’ ba mayuh isu besai ti mangka menua tu, nyengkaum nempa kuasa raja-raja Melayu lebuh iya agi nyadi menteri besai, pia ku Presiden Parti Rakyat Sarawak (PRS) Tan Sri Datuk Amar Dr James Jemut Masing.
Ku iya nambah, Tun Dr Mahathir Mohamad, 93 taun, semina deka ngubah pengilap iya lebuh gawa pengelama 22 taun.
“Orang tu pemunas ba mayuh pekara. Iya ngambi kuasa sultan. Diatu iya datai baru deka ngaga ubah ba pekara ti udah digaga iya.
“Reti nya, pengawa alai iya ngaku pengilap diri. Nya kebuah, kitai neju ngagai rayat ngaga pemutus maya 9 Mei tu ila sekalika rayat agi keran ke iya. Nya alai, 9 Mei tu iya nya hari ungkup Mahathir,” ku Masing lebuhka dikerandau di rumah iya, ditu, kemari.
Sapit Kepala Menteri nyemetak madahka Dr Mahathir baka udah enda ingatka pengawa ti udah dikereja iya suba.
“Tang rayat agi ingat nama pekara udah dikereja iya ngagai PKR enggau DAP. Diatu iya udah ngemaruhka nama diri empu lalu dekaka rayat Malaysia ngampunka pengilap ti udah digaga iya ngelama tu. Tang ulihka rayat ngampunka iya? Ulihka PKR ngampunka iya tauka ulihka Lim Kit Siang ngampunka iya?” ku iya nanya.
Ngelansa pasal penuduk PRS, Masing nyemetak madahka nama penyandang Lubok Antu, Datuk William Nyallau Badak enggau penyandang Selangau, Datuk Joseph Entulu Belaun, nadai dianjung ngagai bala ketuai tetinggi Barisan Nasional (BN) alai ngetanka penuduk seduai maya PRU14 tu.
Ungkup Lubok Antu, PRS semina nganjung siti nama aja tang iya enda nyebut nama orang nya kelimpah madah iya diatu bekereja nyadi pemesai tinggi perintah.
“Aku minta ampun enda ulih mantaika nama iya ngagai kita jam ke diatu laban iya agi gawa perintah lalu kami mega deka ngelempai sekalika ngagai Menteri Besai tauka Kepala Menteri mantaika pekara tu.
“Baka udah disebut, kereja kami ari parti udah tembu laban kami udah nganjung semina siti aja nama ba tetiap enam sitak kami.”
Tang berita ngerimbas pending madahka nama chalun PRS ungkup Lubok Antu iya nya Robert Pasang Alam, 51 taun, ke diatu gawa nyadi Direktor Pendawa Nengeri Sabah. Udah nya, di Selangau, nyangka luyar indu, Rita Imsul.
Masing nandu, pengawa dikemeran parti iya ti udah nganjung semina siti nama chalun bepenau dikena nyeliahka pengawa ngelakuka diri enti sema lebih ari siku.
“Tu siti chara dikena nyeliahka pengawa ngelakuka diri ti enda manah. Tang ba pekara chalun kami enda diterima bala ketuai tetinggi BN ketegal mayuh macham leman, kami deka nganjung nama bukai dikena nyilih nama ke bisi,” ku iya.
Masing, ke mega Sapit Kepala Menteri keran madahka PRS deka bebendar ngetanka penuduk sida empu lalu milih chalun nitihkah peminta BN.
“Ba dua pengawa bepilih besai ke udah, kami udah nganjung semina siti nama ba tetiap sitak laban kami nemu, kami udah milih chalun ti betul. Enti kami nganjung lebih ari siku, tentu tu deka nganyanka kami agi kakang. Nyadi presiden parti, enti aku enda nyemetak ba pekara tu, sapa agi?” ku iya mutus jaku.
Reti nya, pengawa alai iya ngaku pengilap diri. Nya kebuah, kitai neju ngagai rayat ngaga pemutus maya 9 Mei tu ila sekalika rayat agi keran ke iya. Nya alai, 9 Mei tu iya nya hari ungkup Mahathir. Tan Sri Datuk Amar Dr James Jemut Masing Presiden PRS