BR1M inisiatif dikena mantu rayat kurang penatai pemisi
MARUDI: Bantu Rayat 1Malaysia (BR1M) iya nya inisitif dikena perintah mantu raban seranta enggau sida kurang penatai pemisi lalu bantu tu bepelasarka ungkus barang ba makit baka minyak makai, gula enggau ke bukai ti kurang subsidi.
Nya alai, perintah udah melanja beribu ringgit ngambika rega minyak makai enda niki kelalu tinggi.
Rega tu mega bela ngagai sida ti kaya tau seranta, tauka sama, ku iya. Ambika chunto baka bala bakih kitai di genturung pendiau, sida semina ngena motosikal tang reta minyak petrol tetap sama baka diasai sida ti kaya.
Mayuh rayat sebanaka Chukai Barang Enggau Servis (GST) ngasuh rayat tusah tang ku iya, sekeda barang deka bisi GST lalu perintah bekenaka GST ungkup raban tu.
Penerang tu dipansutka Sapit Speaker Aum Kunsil Nengeri ( DUN) ke lalu nyadi Kaban Kunisl Nengeri (ADUN) Mulu, Dato Gerawat Gala lebuh bejaku ba Pengawa Nyuaka BR1M ngagai 332 iku datai ari 39 bengkah genturung pendiau enggau rumah panjai di Mulu sereta 10 bengkah genturung pen- diau di Pelilih Marudi, enggau kesemua bantu sepenyampau RM334,350.00
Ku Dato Gerawat nambah, perintah patut mantu raban seranta lalu iya nangkan penerima BR1M ngena memanah belanja sida sereta bebelika barang ti patut, seraya ngelalau sida ti nerima bantu tu, patut nambahka penatai pemisi sida laban BR1M tu ukai lama.
“Enti penatai pemisi kita majak manah, kita deka semina deka nerima beberapa sen aja. Gaga dagang diri lalu anang bepanggai ba BR1M aja,” ku iya.
Taja pia, berita manah, dalam taun baru lalu tu pengudah Pengawa Bepilih Besai Ke-14 (PRU14), enti sema Barisan Nasional (BN) menang, dia BR1M deka niki ari RM1,200 ngagai RM2,000, ari RM900 ngagai RM1500 sereta ari RM450 ngagai RM700, ku iya, tang tentuka BN menang maya bepilih tu.
Sama bisi datai Pemesai Pelilih Marudi Mackos Sibong, ASP Jaimi Hussen, Mohammad Nazir ari Kaunsil Pelilih Marudi ( MDC) enggau Pemancha Chong Chin Hui.
Kelimpah ari pengawa nyuaka BR1M, Gerawat mega bisi nyuaka chek geran Projek Mit Pemansang Menua Pesisir (MRP) iya ngagai bala penerima ari Serakup Apai Indai enggau Pengajar (PIBG) Sekula Primari (SK) Poyut RM10,000, PIBG SK Sg Brit RM8,000, Serakup Hockien Baram RM10,000 enggau PIBG Sekula Sekondari (SMK) Marudi RM20,000.