Najib mujur mai pangka besai ngagai pemansang Sarawak

LIMBANG: Menteri Besai Datuk Seri Najib Tun Razak mujur mai pangka ke besai ngagai pemansang di Sarawak lebih agi ngagai 125 bengkah menua rambau 60 kali pejalai iya ngelawa nengeri tu, ngayanka iya siku ketuai chukup manah sereta siruka peminta rayat Sarawak.

Mandat tegap ari Sarawak mega nyadi sukung meri kuasa ngagai Kepala Menteri Datuk Patinggi Abang Abdul Rahman Johari Tun Openg (Abang Johari) ngiring pengawa nampung randau magu kuasa ti udah lenyau enggau hak nengeri tu baka udah disempekat dalam Sempekat Malaysia 1963 ( MA 63).

Sapit Kepala Menteri Datuk Amar Awang Tengah Ali Hasan mansutka jaku tu lebuh bejaku ngelanchar jentera pengawa bepilih Barisan Nasional (BN) P221 Limbang di Balai Komuniti Bunga Raya, Hari Tiga tu tadi.

Iya minta jentera BN di Limbang enggau Lawas nentuka pemenang besai BN dalam manifesto nyukung Abang Jo, ti ada di Limbang, ngena mandat bejaku enggau raban bekuasa ungkup Sarawak.

Sapit kepala menteri nya madahka Najib, bisi juluk ngangkatka Malaysia nyadi menua mansang ti ulih nyungkak tikas idup komuniti lalu BN patut pulai baru maya PRU14 tu, nampung juluk tu.

“Nadai kala Menteri Besai Malaysia ti siru pasal Sarawak baka Najib lalu 60 kali pejalai iya ngagai 125 bengkah menua mantaika pemanah pengawa ti patut dibalas enggau mandat dikena nampung pengawa ti udah digaga iya ungkup Sarawak,” ku iya.

Awang Tengah, ke mega Menteri Industri enggau Pemansang Pengawa Dagang enggau Menteri Pemansang Mengeri Enggau Pengeraja Asal Kedua, madahka walkabout Najib di Sarawak kandang semilan taun ke udah bisi ngagihka belanja penyampau RM4.6 biliun ungkup Lim- bang enggau Lawas.

“Kitai beratika Najib bisi semangat ngangkatka Malaysia ngagai menua mansang enggau nyungkak tikas idup rayat lalu BN di baruh pegai iya patut dipulaika baru ngambi nampung peminta enggau pemansang Sarawak,” ku iya.

Ku Awang, manifesto BN di renggat nengeri enggau nasional mungkur semua pekara sereta ngemeratka pemansang raban nembiak enggau orang indu, ngenegapka kuasa sida ke indu sereta ngemesaika penyereta sida dalam ekonomi enggau pemansang menua.

Ku iya nambah, rayat patut anang bepanggai ba bala ketuai Pakatan Harapan (PH) ti bisi penyelai, datai begulai dalam ruang bilik ari pengelantang politik.

Awang Tengah udah nya nyuaka kereban kimpin jentera bepilih BN ngagai bala ketuai parti komponen BN ari PBB, SUPP, PRS enggau PDP di sitak Parlimen Limbang.