NGO Dayak arapka bisi anak Dayak bediri minta pilih ba P.217 Bintulu

MIRI: Sekeda gempung ukai dikuasa perintah ( NGO) Dayak ditu andal amat deka meda chalun Dayak bediri minta pilih ungkup penuduk P217 Bintulu maya Pengawa Bepilih Besai Ke-14 (PRU14) tu.

Nitih ku Presiden Pemansang Dayak (PD) Bintulu Bintulu, Clement Ughan madah menua Bintulu udah kelalu lama dipegai pengari ukai bansa Dayak, taja bansa Dayak nyadi bansa majoriti dia.

“Belalauka penerang diambi ari website Opis Residen Bintulu, penyampau tubuh peranak ditu mungkur 45.85 peratus bansa Dayak, dibia 14.53 peratus bansa China enggau 18.34 peratus Melayu tauka Melanau, seraya ke bukai iya nya bansa bukai.

“Belalauka penerang tu, kitai ngasaika udah umbas endur bansa Dayak, sekalika ari Barisan Nasional (BN) tauka Pakatan Harapan (PH), dichalun bediri minta pilih ungkup penuduk tu,” ku iya.

Ku iya nambah, chalun ti bepenau patut ari tulin bansa Dayak empu, laban semina bansa Dayak aja ulih gawa negika hak komuniti Dayak.

Penemu Clement mega disukung Ketuai Pampang Serakup Dayak Sarawak (Pedas) Bintulu, Pete Bujang.

Ku Pete, bala sida udah lama nganti pengari bansa Dayak di Bintulu, lalu dikena ngasuh pekara tu nyadi nyata, chalun maya pengawa bepilih tu patut dichalun ari komuniti Dayak.

“Chalun Dayak ti bisi penau mega meseti dikelala di renggat baruh sereta mega nemu amat pasal isu kemaya hari ditapi bansa Dayak, baka isu bekaul enggau tanah Hak Adat Bansa Asal ( NCR), penyikap perengka guna pemun, pelajar sereta mega pengelantang kitai.

“Kami seruran gawa negika hak bansa Dayak, nya kebuah, manah agi enti sema chalun ti disabung ari sebarang parti politik ti bediri minta pilih, sekalika iya BN tauka PH, endang ari komuniti Dayak empu,” ku Pete.

Seraya pemungkal Sarawak Liberation Movement (SLM), Jarau Ajan madah lebih 60 peratus pengundi Dayak deka diarika siku pengari ari komuniti sida empu.

“Aku pechaya lebih ari 60 peratus pengundi Dayak deka ngembuan chalun ari bansa Dayak mega. Kitai dekaka ketuai ti ulih ngetan enggau gawa negika hak kitai,” ku iya.

Rambau pengawa bepilih parlimen sebedau tu, penuduk Bintulu meda bepadan nengali alan antara BN enggau Parti Tindakan Demokratik (DAP) ke alai pemutus iya BN- Datuk Tiong King Sing teulihka 26,458 undi ngalahka chalun DAP-John Brian 19,025.