Tu suah disebana pesereta Felcra ketegal bayar dividen ke enda setipak enggau pemesai tanah sida ke diguna Felcra
SADONG JAYA: Kompeni Felcra Berhad diasuh mansik baru pemeri dividen pesereta program kebun sawit ngambika pemesai dividen nya setipak enggau pemesai tanah sida ke dikereja enggau kebun komoditi nya.
Pekara nya dipansutka Kaban Kunsil Nengeri (ADUN) Sadong Jaya Aidel Lariwoo lebuh bejaku ba Program ‘Quick Win’ ti diatur Opis Menteri Pemansang Menua Pesisir enggau Kandang Menua (KKLW) nengah Felcra Berhad Sarawak di Dewan Sadong Jaya ditu, bedau lama tu ke udah.
Iya mantaika pekara ke bisi bekait enggau pemeri dividen, suah nyadi sebana bala pesereta Felcra kelebih agi di sitak Sadong Jaya.
“Pekara ke suah endar dikerandau sereta nyadi sebana bala pesereta Felcra, iya nya penyampau bayar dividen ke enda setipak enggau pemesai tanah sida ke diguna.
“Enti ulih, aku minta kasih ngambika penyampau bayar dividen tu dipansik baru ngambika penyampau dividen ke diterima pesereta dipeda manah agi lalu ngipak enggau pemesai tanah sida ke diguna,” ku iya.
Aidel nandu baru madahka, mayuh ari penyereta Felcra bisi ngembuan kebun sawit sida iya empu lalu sida iya nemu penyampau untung ke diulih ari tiap ikar tanah.
Iya madah, Ketuai Pegawai Eksekutif (CEO) Felcra kala besemaya deka mansik baru pekara nya maya betemu enggau komuniti genturung pendiau nya, ke digaga dalam bulan Jun taun siti nyin tadi.
“Pekara tu berat ngambika nama Felcra enda jai ba penyereta Felcra,” ku iya.
Program nya dipejadika Menteri ba Opis Menteri Besai, Datuk Seri Nancy Shukri ke bela digulu pengari Menija Kebun Sitak Menua Sarawak, Mohd Jamil Muah- mad Hanipiah ke ngarika Menijer Besai Felcra Wilayah Sarawak.
Nancy dalam jaku iya madah, iya temegah ati meda pemujur siku anak sitak Batang Sadong, Mohd Kasat Bujang Narawi ke mujur dalam kategori Pemenang Harapan ( Projek Kimpalan dan Arca) dalam Pekit ‘Cabaran Perniagaan Luar Bandar’ ( Empas Pengawa Dagang menua Pesisir) tauka ‘Rural Business Challenge’ dalam taun 2016 ti digaga ulih Felcra Berhad.
Asil pemujur nya, siti sempekat bisi digaga entara Mohd Kasat enggau kompeni Karyaneka Sdn Bhd (sebuah kompeni baruh Kraftangan Malaysia).
“Aku ngarapka mensia mayuh di Sadong Jaya landik ngambi peluang ari pemisi rampa menua di sitak tu lalu ngaga pemisi nya nyadi produk ari sitak tu.
“Tu laban Perintah nyendiaka bemacham bantu sereta kuasa kena mantu rayat ngangkatka pengelandik sereta penemu kita dalam pengawa dagang,” ku iya.
Enti ulih, aku minta kasih ngambika penyampau bayar dividen tu dipansik baru ngambika penyampau dividen ke diterima pesereta dipeda manah agi lalu ngipak enggau pemesai tanah sida ke diguna. Aidel Lariwoo ADUN Sadong Jaya