RS1 nyadung 5,000 perengka pengerara api ngagai rumah panjai di Sibu, Lanang
SIBU: Lebih 5,000 perengka pengerara api chap Hyprex udah disadung ngagai semua rumah panjai di Parlimen Sibu enggau Lanang, nengah ‘Rancangan Sibu’ 1 (RS1).
Chairman RS1, Dato Andrew Wong madah, piak sida merambu nyadung perengka pengerara api nya ngagai semua pintu rumah panjai sitak DUN Bawang Assan, Nangka, Dudong enggau Bukit Assek.
“Lebih 5,000 perengka pengerara api chap Hyprex udah disadung ngagau semua pintu rumah panjai di Parlimen Sibu enggau Lanang.
“Ungkup nya, kami melanjaka lebih RM0.5 juta dikena meli perengka pengerara api chap Hyprex tu,” ku iya madah ngagai pemberita pengudah bejadika Projek Perengka Pengerara Api Hyprex di Rantau Panjang, kemari.
Nyadika pemungkal, urung 152 perengka pengerara api Hyprex udah disadung kemari ngagai peranak rumah panjai ba sitak Tutus.
Andrew arapka sida ulih nyadung perengka pengerara api ngagai semua rumah panjai di DUN Bawang Assan ba taun tu.
“Engka ujung taun tauka pun taun baru, kitai ulih nyadung perengka pengerara api tu ba sitak Dudong,” ku iya.
Taja nguna mayuh belanja dikena meli perengka pengerara api nya, tang iya nagsaika nya amat beguna dikena nentuka pengelikun rumah panjai.
Ninting taun ku iya, perintah ngeluarka mayuh belanja dikena nyeleti rumah panjai ke rusak ketegal angus.
“Enti kitai ulih nyelamatka sepintu rumah panjai ngena perengka pengerara api, reti nya kitai ulih nyelamatka sekayu rumah panjai ari angus,” ku iya.
Andrew mega madah, per- engka pengerara api chap Hyprex nya chukup manah sereta muntang dikena, nyengkaum ungkup anak mit enggau orang tuai.
Sama bisi datai iya nya Temenggong Stanley Geramong, Pemancha James Semilan, Sapit Chairman RS1 Andrew Shilling, kaban RS1 Andrew Wong sereta ke bukai.