KSDS ngelaluka peminat sape ngerejista diri nyadi kaban kelab
SIBU: Kelab Sape Dayak Sibu (KSDS) diatu benung chakah ngerejister kaban baru ungkup kelab nya lalu pengawa nya endang ngelaluka barang sapa ti rinduka perengka muzik sape lebih agi sida di menua sitak tengah ditu.
Chairman iya, Anthony Abong madah, KSDS mega deka ngatur kelas sape ngagai sida ke bisi ati belajarka perengka muzik tu.
“Kelimpah ngiga kaban, kami mega bisi muka kelas sape. Kelas tu deka berengkah enda lama agi lalu penerang silik deka dibantai ba laman facebook kami iya nya KSDS,” ku iya madah ngagai Utusan Borneo, apin lama ke udah.
Anthony madah, KSDS engka enda semina bepang- gai ngagai sape aja nyadi nya deka dikerembai tanggungpengawa iya ke mungkur pekara budaya enggau main asal bansa Dayak.
“Engka dalam KSDS kami enda semina fokus ngagai kelas sape aja tang mega kami merambu deka muka kelas kuntau, ngajat, betabuh enggau kebukai jemah.
“Tu bekau bisi entara kami ngembuan pengelandik ngajat, kuntau, betabuh enggau ke bukai,” ku iya.
Ku iya, semua nya endang dikena ngumpul belanja ungkup kelab berindik ari KSDS deka nyadi sebagi ari gerempung ukai perintah (NGO) lalu begunaka belanja ari piak bekaul lebih agi pengari rayat enggau perintah.
“Laban bisi penanggul ba sentang belanja KSDS deka ngatur program endang bisi tatak. Nya alai, kami merambu deka ngepunka kelas sape aja, sebedau ti ngerembaika main asal Dayak ke bukai baka ngajat, betabuh enggau kuntau dudi hari ila dikena nambahka penatai pemisi kelab.
“Duit ke diulih nya deka dikena ngatur aktiviti ke pemaik bala kaban kelab,” ku iya.
KSDS mega ku iya, deka nyuak sape nitihka peminta ari mensia mayuh dikena nyungkak belanja kelab enggau orang ti ngaga iya.
Nangkan nya, KSDS apin lama ke udah bisi dikangau Sarawak Body Arts Association merindang nyerumba Ekspo Tatu Sibu 2018.
KSDS betuaika Anthony mega bisi nebah muzik baka Datun Julud, Lasan, sape moden enggau mandangka ajat ungkup mensia mayuh ke bisi ngulu program ekspo nya.
“Kami mega ngelaluka sebarang kangau ari pengatur program dedini pengerami, dalam pengawa ngelaluka KSDS seraya ngiga kaban,” ku iya.
KSDS mega udah direjister ba Opis Pengerejister Gerempung (ROS) kena April taun nyin kemari.
Barang sapa ke bisi ati deka nyadi kaban kelab tauka masuk kelas sape, ngajat, betabuh enggau kuntau ulih betelefon nuju Anthony ngena lumur 013-5650914, Noreen Manggie (019-2372179) tauk Kevin Nyait (016-5765117).