Bisi lima batang tuju Program Fiesta NBOS

SARIKEI: Program dikena nempa kaul enggau rayat entara lima batang tuju Program Fiesta Stategi Tasik Biru Nasional (NBOS) ke diatur berengkah ari kemari.

Pemesai Pekara Wang Perintah Besai Opis Pekara Belanja Malaysia Sarawak, Mohd Saiful Sungkih Abdullah madah, nengah program NBOS rayat ulih berandau enggau bala ketuai baik nya pemesai perintah nengeri tauka perintah besai kelimpah pemesai ba renggat nengeri enggau perintah besai.

kenu ku iya, tuju ti kedua mungkur aktiviti eksibisyen enggau ngenataika serivs ngatur pengawa, pemansang infrastruktur, pemansang menua pesisir enggay batanam betupi, pemansang perengka guna mensia mayuh, pemansang tanah, pemansang industri enggau pengawa dagang, pekara pelajar, sosial, ngintu pengelantang enggau servis pengerai, ngatur rampa menua enggau mayuh agi ke bukai.

“Nengah program NBOS, ulih mantaika penerang enggau penyedar ngagai rayat bekaul enggau polisi, program enggau aktiviti perintah nengah eksibisyen ti disediaka ejensi perintah besai enggau nengeri Sarawak,” ku iya.

Program NBOS ke diatur pengelama tiga hari ba laman Dewan Suarah Sarikei.

Saiful madah, batang tuju ketiga program NBOS iya nya nyendiaka pelasar dikena ngemuntangka pengawa meri bantu ari perintah nuju raban orang ke diselinting.

“Ambika chunto, nyendiaka servis buah penemu bekaul enggau servis ngelon belanja, bantu indai tunggal, orang tuai, mayuh skim bantu batanam betupi, pengawa berumah, dagang kediri enggau mayuh agi ke bukai,” ku iya.

Iya madah batang tuju ti keempat nyendiaka peluang pengawa dagang ngagai raban pedagang tauka mensia mayuh sepanjai program tu diatur.

Kenu ku iya, piak pengatur deka nyendiaka bansal bejual ungkup peranak ke besemak nyual produk sida nyengkaum barang pemakai enggau ai irup.

Ku iya, batang tuju kelima, gempuruka rayat pupu bansa nyereta aktiviti tanggungpengawa rama (CSR), bemain, sereta berandau dikena neleba agi kaul enggau pangan dri.

Iya ngarap, inisiatif perintah tu ulih nyapai tagit dalam nyapai tuju sereta meri pemaik ngagai peranak Sarikei lalu nerang ngagai sida inisiatif, inisiatif NBOS, servis-servis dipejalaika perintah.

“Arapka pemanah kaul perintah besai enggau perintah nengeri seruran manah,” ku iya.

NBOS Sarikei diatur Opis Menteri Pekara Wang nengah Opis Pengatur Belanja Menua Sarawak (PMS) Sarawak begulai enggau Opis Menteri Kepala Menteri Sarawak nengah Unit Pematau Pengatur Pengawa Nengeri (SIMU) enggau Opis Residen Bagi Menua Sarkei.