Ex-chairman DAP Sarawak udah nadai ba Australia
SIBU: Ex- chairman Parti Tindakan Demokratik (DAP) Sarawak, Dato Jason Wong Sing Nang, 60, udah nadai ba Sydney, Australia pagi kemari ketegal penyakit riman tulang.
Pemidang niang ninggalka bini enggau dua iku anak lelaki.
Nitih penerang, kaban belayan iya deka bekejang ngagai Sydney sehari tu (14 April) endur meri basa kepenudi ngagai iya.
Wong, siku luyar ti chukup dibasa kala nyadi Kaban Parlimen Lanang pengelama sepenggal (1990-1995).
Tu bekau pemujur iya ngalahka chalun Parti Sa’ati Rayat Sarawak (SUPP) Tieu Sung Seng ba Pengawa Bepilih Besai Ke-8 (PRU8) taun 1990.
Penuduk nya taja pia diambi SUPP baru ba pengawa bepilih nangkan nya pengudah iya alah ngagai Datuk Tiong Thai King ke diatu nyadi Kaban Kunsil Nengeri (ADUN) Dudong.
Ba Pengawa Bepilih Besai Nengeri ( PRN) Sarawak 1996, Wong meri mensia mayuh tekenyit pengudah iya menang ba penuduk Kunsil Nengeri ( DUN) Pelawan lepas ngalahka chalun SUPP, Vincent Goh Chung Siong.
Vincent Goh ti bediri minta pilih baru ba PRN 2001 nengah tiket chalun Barisan Nasional (BN) iya nya ngarika SUPP maya nya mujur ngerampas baru penuduk nya.
Taja pia, iya ke endang pengari rayat DAP Wong bisi nyukung rang undangundang ti dibantaika perintah nengeri nyengkaum ubah ba Kanun Tanah Sarawak.
Ba taun 2013 iya diberi anugerah gelar Dato ari Perintah Nengeri.