Enam NGO deka ngatur Pengerami PG-PM 2018 ba Balai St. Jerome, Kaki Wong, Krian

KUCHING: Enam buah Gerempung Ukai Dikuasa ulih Perintah (NGO) deka ngatur Pengerami PG-PM 2018 kena 26 Mei di Balai St. Jerome, Kaki Wong, Krian (Saratok).

Enam buah NGO ke enggau ngulu atur pengawa tu, iya nya Saratok Update, SADIA- Krian, PEDAS, Dayak Gempuru, DTTG-Kuching enggau Ruai Cyber Dayak.

Pengari ari gerempung SADIA- Krian, Andrew Paul madah raban gerempung tu deka ngelancharka ‘ Set Menu’ kitai Iban ngambika sama bisi baka enggi bansa orang bukai.

“Ambika chunto, baka enggi pupu bansa Melayu, sida iya bisi Nasi Lemak, enggi India bisi Nasi Beriyani, lalu enggau Foochow bisi Mee Kampua tauka Foochow Mee.

“Nya alai, bala tu deka ngangkatka ‘ set menu’ kitai Iban ke dikumbai ‘ Pemakai Menoa’,” ku Andrew, ke nyerumba pengerami nya baka pengerami bansa Jerman ke di intu sida iya ninting taun dalam bulan Oktober, Oktoberfest.

Pengawa pemungkal ku iya, deka bejadika pekit mandul lauk ‘Set Menu’ ke deka dipejadi ulih siku aktivis ke tebilang enggau pengawa iya ngenanka Pemakai Menua tauka Tanah Adat, Nicholas Bawin.

Atur pengawa 26 Mei nya ila deka berengkah enggau pengawa bese- rumpu ngirup pagi ( 8 pagi), pekit manduk lauk Pemakai Menua (10 pagi), Jaku Pemuka ari Victor Ason ti mega nyadi chairman pengatur atur pengawa tu (4 lemai), Jaku Kenang ari Nicholas Bawin (4:30 lemai), Bejadika Set Menu Pemakai Menua ( 5 lemai) lalu ditangkan enggau atur pengawa ke penudi, Beperindang enggau Mark Benet ( 8: 30 malam).

Ba sentang Pekit Manduk Lauk Pemakai Menua, perais pekit bisi disediaka alai sida ke menang nyadi champian deka mai pulai wang RM500, lumur dua (RM300) lalu lumur tiga (RM200).

Bayar masuk enggau pekit manduk ‘Set Menu’ Pemakai Menua iya nya RM50.00, enggau penyampau tubuh ti dikemendarka 30 penyereta/tim.

“Bala kami nesau semua kitai ke ulih enggau ngerami program tu, datai bebala mayuh ngulu program tu,” ku iya.

Kelimpah ari nya, pengawa ke bisi digaga beserimbai enggau atur pengawa tu, ke deka digaga dalam kandang dua hari, 26-27 Mei 2018, iya nya beperindang enggau lagu Gawai, bejualka utai pakai enggau ai irup, bejualka sayur/jelu babas, bejualka Bup Jaku Iban, bejualka manuk Iban, bejualka baju NGO, bejualka utai tunu sereta ngerijista raban baru NGO, ku iya.