Sida ke bedagang tauka bedaja meseti nitih atur PBT enda ngena tungkus pemakai nya
KOTA SAMARAHAN: Tungkus pemakai ke ngena ‘ styrofoam’ tauka ‘ polisterin’ ditagang dikena, ku Menteri Opis Kandang Menua enggau Pengawa Berumah Datuk Dr Sim Kui Hian.
Berindik ari nya, iya minta bala orang ke bedagang sereta bedaja meseti nitih atur PBT enda ngena tungkus pemakai nya.
Iya mega madahka atur nya mega nyadi siti ari atur minta lisin bedagang.
“Nyema bisi orang bedagang tauka bedaja ke enda ninga lalau nya, PBT deka ngerampas barang sida iya tekala nya,” ku iya.
Iya madah munyi nya nengah teks jaku iya ti dibacha ulih Susan Loh ke ngarika iya lebuh bejadika atur pengawa ‘Katakan Tidak Pada Plastik dan Styrofoam’ di palan bebeli barang Aiman Mall ditu, kemari.
Lebuh bejaku pasal ngena plestik enggau silik agi, Dr Sim madah, beg plestik enda hanchur dalam kandang 100 taun lalu ketegal iya enda muntang anchur tau ngamahka rampa menua.
Ku iya nandu baru madahka, pengawa bekenaka ‘styrofoam’,’polisterin’ tauka plestik ngujungka palan endur muai uras penuh laban tugung barang nya.
“Nengah kimpin tu, kami ngarapka semua piak kelebih agi sida ke bedagang tauka
Nyema bisi orang bedagang tauka bedaja ke enda ninga lalau nya, PBT deka ngerampas barang sida iya tekala nya. Datuk Dr Sim Kui Hian Menteri Opis Kandang Menua enggau Pengawa Berumah
bedaja madah ngagai pengguna mai kantung tauka ngena beg ‘kitar semula’ maya sida iya bebelika barang.
“Kelimpah ari nya, kimpin tu ulih meransang sida ke bedagang ngena beg keretas maya nyual barang sida iya ngagai pengguna,” ku iya.
Iya nandu baru madahka penyampau uras ke digumpul sehari di sitak Opis Majlis Perbandaran Kota Samarahan (MPKS) manggai entara 120 ngagai 140 tan enggau ungkus urung RM3.5 juta setaun.
“Ngagai semua mensia mayuh ke diau di sitak Samarahan, aram meh kitai ngaga pengawa ‘kitar semula’ nya nyadi adat, nengah chara muai lebih utai pakai ke dalam tong uras, lalu plestik, tin enggau besi ulih dikena baru kena ngulihka pemisi,” ku iya.
Sebedau nya, Chairman MPKS Dato Peter Minos ngarapka, mensia mayuh ke diau di sitak Samarahan nyengkaum sida ke bedagang tauka bedaja nyukung pengawa nya, kelebih agi laban deka meda Kota Samarahan tu palan endur diau ke manah, beresi sereta gadung.
“Aku meri besai terima kasih ngagai piak ke enggau ngulu kimpin kami lalu dikarapka kerejasama tu deka dipajakka jemah ila,” ku iya.