Salang pechaya rayat di Parlimen Julau agi nyukung BN ba PRU14
JULAU: Sekretari Besai Parti Rayat Sarawak (PRS) Datuk Joseph Salang andal rayat ba Parlimen Julau sekali agi nyukung Barisan Nasional (BN) maya Pengawa Bepilih Besai Ke-14 (PRU) tu.
Pengandal iya tu ku iya bepun ari meda semina BN aja ti ulih nyaup rayat ngemansangka pengidup ngagai tikas ti tinggi agi.
“Enti kitai meda manifesto BN menua enggau nengeri macham bengkah langgur pemansang enggau projek deka digaga ba nengeri tu.
“Tang semua tu ulih dipenyadika enti BN mengkang nyadi perintah menua sepen- gudah PRU14.
“Nya alai, rayat kelebih agi di menua pesisir anang muai awak tu ngambika kita deka semampai ngasaika pengidup ti meruan,” pia ku iya madah.
Iya mantaika jaku tu maya bejadi ‘Homestay’ Rumah Margretta di Karangan Buloh ditu, bedau lama tu ke udah.
Penatai Salang tu bela disempulang anak pengkuan Menteri Besai Datuk Seri Najib Tun Razak, Nor Ashman Razak.
Nor Ashman ke datai tu laban deka meda enggau semak agi pengidup Iban di rumah panjai nya.
Berebak enggau pengawa tu mega, Salang madahka iya udah nulis surat ngagai Najib minta belanja RM62 juta dikena ngemanahka agi Palan Ngubat Ai Julau.
“Peminta tu dikenataika kitai ngambika mayuh agi rumah panjai di Entabai enggau Merurun deka disambung ai beresi udah tu ila.
“Aku mega andal peminta tu deka dipenyadi enda lama agi,” ku iya madah baru.
Ba pengerami nya Salang nyuaka geran projek mit menua pesisir sepenyampau RM675,500 ngagai 53 buah rumah panjai enggau gerempung di menua nya.