Pengarang berita Malaysia setuju deka bejuraika penumbuh MMC
KUALA LUMPUR: Raban pengarang berita udah besetuju deka bejuraika penumbuh Kunsil Pengarang Berita Malaysia (Malaysian Media Council tauka MMC).
Perambu nya entara pekara ti bisi dipejuraika ulih pengari ari urung 20 gerempung pengarang berita ba atur pengawa nyambut Hari Pengarang Berita Nasional (HAWANA) 2018 ti diatur ditu, kena hari Tiga tu tadi.
Menijer Besai Berita Nasional Malaysia (BERNAMA), Datuk Zulkefli Salleh madai kunsil nya deka ngangkatka imej, kualiti sereta pengawa profesional pengarang berita dalam industri pengarang berita nasional.
“Udah datai maya iya Malaysia ngembuan kunsil pengarang berita kediri empu, laban pekara tu sigi udah lama dipejuraika ari taun 1970 kelia.
“Pekara tu deka ditedap enggau silik agi, ngipak enggau pemansang industri media di menua tu,” ku iya madah lebuh bejaku ba atur pengawa nyambut ‘Hari Wartawan Nasional 2018’ ti digaga di Palan Konvensyen enggau Pengawa Pemandang MATRADE ditu, kemari.
HAWANA 2018 bela digulu ulih urung seribu iku pengarang berita ari serata menua Malaysia nyengkaum ari Sarawak enggau Sabah, sereta Indonesia.
Zulkefli nandu baru madahka kunsil nya deka nyengkaum kaban pengarang berita sereta mensia mayuh, sereta pemain industri bukai, beratika media di menua tu ba jalai ke betul.
Ba atur pengawa nya mega, Editor Eksekutif Berita Harian, Ahmad Zaini madah jurai ke silik agi patut digaga bekait enggau penumbuh kunsil tu, ngambika kunsil tu deka bela nyengkaum kededua pengawa media elektronik enggau chelak.
“Perambu tu udah lama dipejuraika, tang diatu iya meseti beratika pekara media digital,” ku iya.
Direktor Besai surat berita The Sun, Freddie Ng madahka kunsil tu patut nyengkaum semua pengarang berita, ngambika palan tu ulih dikarapka ulih semua pengarang berita.
“Dalam kunsil tu, enda ulih nyengkaum pengari ari ijinsi Perintah, kunsil pengarang berita deka lenyau ‘credibility’ iya. Perintah enggau pengarang berita ‘enda ulih bepegai jari’.
“Pengawa pengarang berita enggau ijinsi Perintah nyerumba dua piak trek jalai besi. Amat kededua tu diau begulai tang bisi entara tiga kaki, sama nyingkang ba penuju ke sama. Enti kededua piak trek tu betemu, enggau ke pansut ari jalai besi nya.
“Nya alai, atur meseri ditetapka dalam kunsil pengarang berita, enda tau enda datai ari media nya empu, ukai ari Perintah,” ku iya ke bejaku ngena jaku sempama.