Tetiap kompeni ti deka ngereja minyak enggau gis di Sarawak meseti ngulihka lisin ari perintah nengeri, ku Abang Johari

KUCHING: Kepala Menteri Datuk Patinggi Abang Johari Tun Openg madah kompeni ti deka ngereja minyak enggau gis di Sarawak meseti ngulihka lisin ari perintah nengeri.

Ku iya, tetiap kompeni nya meseti nitihka penetap Ordinan Ngelumbung Minyak Sarawak 1958.

“Tajapia, kitai ukai nagang kompeni arika beranak puku ba industri minyak enggau gis ditu.

“Kitai semina dekaka sida nitihka penetap ordinan( Ordinan Ngelumbung Minyak Sarawak 1958) kitai,’ku iya.

Iya mansutka jaku nya ba aum pengarang berita pengudah ngemata pengawa nyain sempekat pemereti ati (MoU) entara Opis Pekara Wang Nengeri(SFC) enggau Shell Gas Holdings(Malaysia) Limited.

Ba pengawa nyain Mou ke diatur di sebuah hotel ditu nya, SFC ngambi 15 peratus syer ari Shell Gas Holdings(Malaysia).

Nyaut tanya ke sama ari pengarang berita, Abang Johari madah hak Sarawak ba sentang atur ngereja minyak enggau gis sigi bisi disebut ba Ordinan Ngelumbung Minyak Sarawak 1958.

Ku iya, hak nengah ordinan nya enda ditemu nyentukka diatu lalu ketegal nya diatu Sarawak deka neritka penetap nitihka ordinan.

“Tu ukai salah sesapa tang ketegal kitai enda nemu hak tu bisi ba dalam ordinan ngelama ke udah,”ku iya.

Sentang sekeda konmpeni minyak baka ke Shell, Petronas enggau ke bukai ti deka ngereja minyak ba kandang tasik Gorek, Larak enggau Bakong, Abang Johari madah sida meseti ngulihka lisin ari Sarawak.

“Aku deka ngasuh sida( Petronas) ngambi lisin ari kitai(Sarawak), iya nya nulis surat pinta ngagai kitai,’ku iya.

Tajapia, kitai ukai nagang kompeni arika beranak puku ba industri minyak enggau gis ditu. Datuk Patinggi Abang Johari Tun Openg Kepala Menteri Sarawak

NERANG RETI: Abang Johari(tengah) nerangka ngagai pengarang berita sentang Ordinan Ngelumbung Minyak Sarawak 1958. Bela dipeda Menteri Pekara Wang II Dato Sri Wong Soon Koh(kiba) enggau Menteri Utiliti Dato Sri Dr.Stephen Rundi(kanan).