Richard Riot pechaya iya agi dichalun baru

SERIAN: Datuk Seri Richard Riot Jaem ti nyadi penyandang sitak Parlimen Serian melabaka iya agi dichalunka baru ba Pengawa Bepilih Besai Ke-14 (PRU 14).

Iya bisi pengarap ngagai diri empu dichalunka baru bepelasarka pengawa ti dipejalaika ngagai menua, nengeri sereta rayat ti diarika iya ba Parlimen Serian.

Lebuh ditanya pengarang berita nama pengarap sereta deka dipejalaika nyema dichalunka ba PRU14, Riot nyaut,

“Nuan (pengarang berita) ninga aku enda dichalun? Aku ngasaika nuan ( pengarang berita) patut nanya Menteri Besai (PM),” ku iya.

Riot ti nyadi Menteri Pengatur Pengereja Pengawa dikerandau pengudah bejadika ‘Hari Terbuka Keselamatan dan Kesihatan Pekerjaan di Sekolah’ enggau Projek Ngaga Jalai Besai Pan Borneo Sarawak 2018 ti diaturOpis Pengelikun enggau Kereja (JKKP) enggau Institut Pengelikun enggau Kereja Menua (NIOSH) ba Dewan Mayuhguna, SJK Chung Hua Serian ditu, kemari.

Riot keterubah iya bediri minta pilih ba Parlimen Serian dalam taun 1990 ti nyadi chalun ngatika diri sereta menang ngelaban chalun BN.

Udah nya iya bediri minta pilih ngena tiket BN ba taun 1995 pengudah masuk Parti Sa’ati Rakyat Sarawak (SUPP) lalu iya udah enam penggal pengudah terus ngetankan sitak Serian maya PRU13.

PRU13 iya ngalahka dua parti ti ngelaban BN iya nya DAP (Edward Andrew Luwak) enggau STAR (Johnny Aput), enggau majoriti 13,151 undi.

Ba taun 2010, iya dipilih nyadi sapit menteri luar sebedau ditikika nyadi menteri Pengatur Pengereja Pengawa ba taun 2013.