NIOSH ungkup Sabah, Sarawak digaga di Serian
SERIAN: Bagi menua Serian deka endur numbuhka sebuah institut pematih, Institut Pengelikun enggau Pengerai Pekereja Menua (NIOSH) ungkup Sabah enggau Sarawak.
M e n t e r i P e n g a t u r Pengereja Pengawa, Dato Sri (Dr) Richard Riot Jaem madahka, institut nya ditumbuhka endur ngelatih, ngajar sereta meri kus dikena ngurangka penusah bebadi ba endur gawa nyadi.
Iya ngarapka mensia mayuh anang salah anggap ngagai perambu ke dibantaika iya, kelebih agi maya Pengawa Bepilih Besai Ke-14 kena 9 Mei tu ila.
“Aku deka madahka berita manah, NIOSH sebuah ejensi dibaruh opis menteri pengatur pengereja pengawa, lalu kitai udah beberapa kali baum enggau NIOSH.
“( Asil ari aum) NIOSH udah setuju deka numbuhka institut pematih ungkup Sabah enggau Sarawak ti bepalan ba Serian.
“Orang Serian tu ukai semaya politik, pekara tu (numbuhka institut pematih NIOSH) dipesetuju sebedau parlimen direrak, perambu tu digaga kitai tiga taun udah,” ku iya.
Riot mantaika pekara nya lebuh bejadika Hari ‘Terbuka Keselamatan dan Kesihatan Pekerjaan Di Sekolah’ enggau Projek Ngaga Jalai Besai Pan Borneo Sarawak 2018, ti diatur ba Balai Mayuhguna SJK Chung Hua, Serian ditu, kemari.
Hari Ngelalu Mensia Mayuh nya diatur NIOSH begulai enggau Opis Pengelikun enggau Pengerai Kereja (JKKP) sereta sukung ari Opis Menteri Pengaur Pengereja Pengawa.
Seraya madahka orang Serian untung enggau penumbuh nya, Riot madahka penumbuh institut pematih NIOSH nya dikena nambahka Institut Pematih Industri (ILP) ke deka ditumbuhka ba Bagi Menua Serian.
“Nengah kerejasama semua opis bekaul ke ari baruh Opis Menteri kelebih agi baka NIOSH sereta HDRF pasal penumbuh ILP. Aku minta pengawa berengkah dipe- jalaika ba minggu keterubah bulan Mei, baka ke udah disemaya maya bejadika suba,” ku iya ti mega penyandang Parlimen Serian.
Kelimpah ari nya, Chairman NIOSH Tan Sri Lee Lam Thye madahka pengelikun enggau pengerai ba sekula mega pekara ti patut dikemerat dikena nyeliahka pekara ti enda dikeingin nyadi.
Iya madahka dalam taun nyin kemari, sekeda penusah bebadi di sekula baka penusah angus ba sekula, nembiak labuh agi begunan, nembiak dilantak kerita dalam kandang sekula enggau ke bukai.
Berindik ari pekara nya Lee madahka NIOSH mai program Pengelikun enggau Pengerai Kereja (OSH) ngagai sekula enggau juluk dikena ngiri penemu ngagai pengajar, nembiak enggau pengereja pengawa ba opis sekula bekaul enggau penanggul ke ulih mai risiko.
“Naka ke diatu kami udah ngatur program OSH ba 50 buah sekula di serata menua nyengkaum Johor, Pahang sereta Sarawak lalu nerima sambut ti manah ari sekula.
“Pekara ti pemadu beguna sereta enda tau enda dikeingatka pengajar, kerani, pekebun enggau ke bukai ukai semina ngajar aja tang pengajar mega pengereja pengawa ba sekula ke enda tau enda nyaga pengelikun ba sekula,” ku iya dalam jaku pengelalu.
Sama bisi datai ngagai pengerami nya kemari, Kaban Kunsil Nengeri ( ADUN) Kedup Martin Ben; ADUN Bukit Semuja John Ilus, Ketuai Sekretari Opis Menteri Pengatur Pengereja Pengawa, Dato Dr Mohd Gazali Abas enggau ke bukai.