Berita ti madahka Chong keran nyatup Dr Sim ba PRU enda amat
KUCHING: Chairman Pakatan Harapan (PH) Chong Chieng Jen nyakal berita ti madahka iya keran deka nyatup Presiden Parti Se’ati Rakyat Sarawak ( SUPP) Datuk Dr Sim Kui Hian ngambi ulih mandang diak semua bansa China di Sarawak berakup nengah Parti Tindakan Demokratik (DAP).
Chong ke mega Chairman DAP Nengeri sereta penyandang penuduk parlimen Bandar Kuching madah iya nadai ngembuan dendam enggau Dr. Sim.
Iya mansutka penerang nya lebuh ditanya sentang jaku ke balat dipetalat di Mengeri Kuching diak iya (Chong) deka bediri di penuduk alai Dr. Sim bediri ngarika Barisan Nasional (BN) ba PRU14 tu.
Ku Chong , pemutus sentang pekara nya deka dipadah dudi ila lalu sebarang pemutus meratka peluang DAP menang lalu nganti perintah besai kelimpah ngalahka UMNO.
“Pengawa bepilih parlimen tu sentang pemaik menua. Menua tu enda ulih agi diperintah UMNO.
“Menua tu nadai tuju nengah embing BN kelimpah ari pengawa makai suap enggau ‘utai lalai’,”ku iya.
Sebengkah berita portal Free Malaysia Today kena 14 April ngeripot Chong deka ngelengka Bandar Kuching lalu bediri di Stampin ba PRU14. Bandar Kuching deka diarika ketuai baru ari DAP iya nya Dr. Kelvin Yii.
Ba PRU14 tu, Stampin disadang mar ditanka DAP ketegal sitak parlimen nya diatu mungkur tiga sitak DUN iya nya Batu Kawa, Kota Sentosa enggau Batu Kitang.
Batu Kawah enggau Batu Kitang dikuasa BN-SUPP lalu Chong nguasa Kota Sentosa.
Penyandang Stampin Julian Tan mutus enda minta pilih agi ketegal meratka pengawa dagang iya ba Kuala Lumpur.