Chalun tu iya nya siku indu ti landik pekara undang-undang lalu siku agi nyadi pendawa raya
SANTUBONG: Siku indu ti landik pekara undangundang entara chalun baru Parti Rakyat Sarawak (PRS) ba Pengawa Bepilih Besai Ke-14 (PRU14).
Presiden iya Tan Sri Datuk Amar Dr James Jemut Masing madahka semua nama chalun ba enam sitak parlimen ke diungkup ngagai parti dianjung sebulan ke udah ngagai Chairman Barisan Nasional (BN) renggat menua enggau nengeri.
Iya ngarapka semua nama chalun nya dikemendarka, lebih agi chalun indu dikena ngamatka pengawa deka meri awak mayuh ngagai orang indu dalam ngatur pengawa.
“Bisi dua iku chalun baru PRS lalu siku nya chalun indu, tang ukai aku mantaika sapa chalun nya. Kededua iya profesional sereta beumur urung 50 taun.
“Siku ari seduai gawa nyadi pendawa raya lalu siku agi penyanding penemu undangundang ba BDA. Tu keteru- bah iya kami mai orang ti landik dalam undang-undang ngagai parti.
“Tu chalun indu keterubah ari PRS, sebedau tu enda kala sereta parti Dayak bukai pan enda kala nganjung chalun indu,” ku iya lebuh dikerandau raban pengarang berita, seharitu.
Dulu ari nya, Sapit Kepala Menteri nya bejadika pengerami nutup program ‘ARGO Empowerment’ ke diatur Jawatankuasa Pemuda PRS Pusat ba sebengkah hotel ditu.
Ngenang chalun indu nya, iya madahka sebedau tu chalun indu nya enda ulih enggau parti ketegal pengawa ti dipangku iya sebedau tu.
Dua chalun baru ke selalu disebut ngelama tu iya nya Robert Pasang Alam enggau Rita Insol ti dipelabaka dichalunka ba sitak Parlimen Lubok Antu enggau Selangau.
Enam sitak parlimen ke diungkup ngagai PRS diatu disandang Datuk Masir Kujat ( Sri Aman), Datuk Wil- liam Nyallau Badak (Lubok Antu), Datuk Joseph Salang Gandum(Julau), Datuk Aaron Aga Dagang (Kanowit), Datuk Joseph Entulu (Selangau) enggau Datuk Wilson Ugak Kumbong (Hulu Rajang).
Kelimpah ari nya Masing madahka parti nya udah besedia amat napi PRU14 sereta arap bendar ulih menang bepelasarka PRU12 enggau PRU13.
“Kepala Menteri enggau Menteri Besai enda kala nulak chalun kami dalam PRU12 enggau PRU13. Lalu pemutus iya, kami menang ba semua sitak parlimen.
“Aku arap bendar pekara ti sama ba PRU14. Kami deka neruska nya sereta meri pulai baru ngagai Datuk Seri Najib Tun Razak,” ku iya seraya madahka nya semaya sida lalu sebedau tu dua kali udah meri semaya ke sama.
Siku ari seduai gawa nyadi pendakwa raya lalu siku agi penyanding penemu undang-undang ba BDA. Tu keterubah iya kami mai orang ti landik dalam undangundang ngagai parti. Tan Sri Datuk Amar Dr James Jemut Masing Presiden PRS