RM2,340, 000 udah diagih ngagai sekeda ejensi perintah di Sarikei
SARIKEI: Sepenyampau RM2,340,000 udah diagih ngagai mayuh bengkah opis menteri enggau ejensi dikena mantu peranak menua ti seranta nyerumba Fiesta Strategi Tasik Biru Nasional (NBOS) diatur ditu, berengkah ari 13 ngagai 15 April tu tadi.
Pengawa nyua replika chek ari bala pengari menteri enggau ejensi bekaul ngagai bala pengawa raban nerima bantu udah dikemata Kepala Menteri Datuk Patinggi Abang Johari Tun Openg lebuh iya bejadi pengawa ngelancharka fiesta tiga hari berunggu, kena Hari Enam tu tadi.
Ari penyampau nya, RM20,000 iya nya ari Opis Menteri Wang dikena mantu raban idup papa di Pelilih Sarikei, Meradong, Julau enggau Pakan, RM596,000 ari Opis Menteri Pelajar ungkup Kumpulan Wang Amanah Pelajar Miskin (KWAPM) diberi ngagai nembiak sekula seranta di Bagi Menua Sarikei, RM440,000 ari Sarawak Economic Development Corporation ( SEDC) dikena mantu bala operator kotej, RM50,000 ari Petronas ngambika dikunsi bela antara Raban Indu Perkim Sarikei, Sekretariat Megai Pengarap Islam Sarikei, Palan Pemulai Pemanah Ulah Belalauka Komuniti (PDK) Sarikei, Julau enggau Pakan, RM1,234,000 ari Opis Menteri Pemansang Menua Pesisir enggau Kandang Menua ( KKLBW) dikena nambahka penatai pemisi sereta nyeleti rumah raban seranta di Pelilih Sarikei enggau Meradong.
Pengawa mega udah ngemataka pengawa nyuaka bantu di baruh Program Perumahan Mesra Rakyat 1Malaysia ari Syarikat Perumahan Negara Berhad; Temporary Occupational Licence ngagai tiga iku ketuai genturung pendiau ari Meradong sereta surat chiri nampung pengawa ngagai bala ketuai komuniti, tuai rumah panjai sereta ketuai genturung pendiau.
Antara sida ke bisi datai iya nya Sapit Kepala Menteri Datuk Amar Douglas Uggah Embas, Ketuai Sekretari Pekara Wang, Tan Sri Dr Mohd Irwan Serigar Abdullah, Menteri Wang Kedua, Dato Sri Wong Soon Koh, Sekretari Nengeri, Datuk Amar Mohamad Morsidi Abdul Ghani, bala menteri di nengeri tu sereta bala pengari rayat ke bukai.