Galeri niang Ballang Lasung udah mujur dibuka ba IPG kampus Batu Lintang
KUCHING: Palan Pematih Pengajar (IPG) kampus Batu Lintang udah ngungkupka galeri dikena meri basa ngagai staf akademik tebilang iya, empat kali menang midul emas ba Lumba Asia Tengara (SEA), niang Ballang Lasung.
Dikelala enggau nama Galeri Ballang Lasung, udah dipenyadi Menteri Pelajar, Sains enggau Pansik Teknologi Dato Sri Michael Manyin Jawong, kemari.
Sama bisi datai bini niang Ballang, Sussana Liew enggau anak indu iya, Sarah, sereta mega Sapit Direktor Pelajar Nengeri Abang Mat Ali Abang Masagus enggau Direktor IPG Batu Lintang Jamiran Salam.
Pengawa udah diatur pengudah Manyin bejadi pengawa muka dua hari berunggu Karnival Innocate 2018 di IPG kampus Batu Lintang ditu.
Ketuai Opis Pengerai enggau Pelajar Fizikal kampus, Dana Raja Narayanasamy ngetuaika bala temuai dipebasa bejalai meda galeri ti ngembuan midul enggau anugerah dimenang niang Ballang, sereta mega gambar lama niang enggau surat berita penyapai iya.
Ballang midang kena 15 March 2008, pengudah ditepan penyakit untak ti jarang nyadi dikumbai ‘Multiple System Atrophy’ pengelama lima taun. Niang sebedau nya nyadi pengelicha pelajar fizikal di IPG kampus Batu Lintang.
Niang kala menang midul emas dalam Lumba SEA 1977 diatur di Kuala Lumpur, SEA Games 1979 (Jakarta), SEA Games 1981 (Manila) enggau SEA Games 1983 (Singapore).
Niang mega dipelanja Malaysian Amateur Athletics Association lebuh ngulu klinik pematih pengelama lapan bulan di Germany dalam taun 1984.
Dikena ngaku servis enggau jasa niang ngagai Sarawak enggau Malaysia, IPG kampus Batu Lintang udah netapka penemu dalam taun 2017 ngaga galeri tu dikena masa ikon ngajar enggau lumba tu.