Pengundi ba Kpg Kolong 2 dikeandal terus nyukung BN
KUCHING: Penyandang kerusi Parlimen Petra Jaya, Dato Sri Fadillah Yusof pechaya mensia mayuh kelebih agi pengundi di Kampung Kolong 2, Jalai Sungai Tengah, Matang ditu deka majak meri sukung ke tegap ngagai Barisan Nasional (BN) maya Pengawa Bepilih Besai ke-14 (PRU14) tu ila.
Ku Fadillah, genturung pendiau tu nyadi sebuah ari kubu tegap BN ke suah meri sukung tegap ngagai iya pengelama iya udah nyadi pengari rayat di sitak nya, baruh Parlimen Petra Jaya.
Ku iya, sukung ke tegut mensia mayuh ari sitak nya ngagai BN sigi meruan sebedau iya nyadi pengari rayat, iya nya lebuh sitak nya agi di arika ulih niang Tan Sri Dr Sulaiman Daud.
“Sukung mensia mayuh ari sitak Kolong nya ngagai BN enda kala tusur ari tu datai ngagai kediatu nyengkaum baruh pegai niang Tan Sri Dr Sulaiman Daud, alai niang maya iya agi idup suba, meri dewan ngagai genturung pendiau dia.
“Kediatu aku ke nyadi ketuai ditu, majakka pengawa ke udah digaga pemesai sebedau aku, nyengkaum niang, alai kami ngembuan kaul ke terit entara betuaika komuniti sereta Parti Pesaka Bumiputera Bersatu (PBB)kelebih agi BN,” ku iya.
Iya madah munyi nya lebuh dikerandau ulih pengarang berita ba program pemesai begulai enggau rayat di di dewan genturung pendiau nya, kemari.
Sebedau nya, ba jaku Ketuai Ranting PBB Kampung Kolong 2, Rosmidi Amat Parnawi madah mensia mayuh kelebih agi pengundi di genturung pendiau nya nyadi pengundi tegap BN.
Sukung komuniti ari sitak tu ngagai BN enda kala kurang taja pan bisi sida penyakal nguji tama kia.
“Kami rayat di Kolong tu nemu ni bagi piak ke gawa ngemansang sereta ngemajuka kami ditu.
“Nya alai, kami di renggat pemesai pun menua parti PBB enggau kelebih agi BN deka beratika sitak Kolong tu deka majak nyadi kubu tegut BN,” ku iya madah lebuh dikerandau maya program nya kemari.