Raban nembiak PBDS Baru nyukung pemutus chalun maya PRU14
SIBU: Raban nembiak Parti Bansa Dayak Sarawak (PBDS) Baru nyukung tegut ketuai parti nya ba pengawa nentu sapa bagi chalun ti deka bediri maya Pengawa Bepilih Besai Ke-14 (PRU14) ti deka datai.
Sekretari Raban Nembiak parti nya Julius Enchaha madah, ke amat beguna ba siku chalun nya ukai semina populariti tang patut dipeda ari sukut integriti, kredibiliti sereta mega pengeransing megai tanggungpengawa.
“Raban nembiak PBDS Baru deka nyukung penuh sapa bagi ti deka dichiri nyadi chalun parti.
“Ke diatu chalun PBDS Baru benung diperatika ba renggat kepenudi,” pia ku iya madah.
Iya mantaika penerang tu sepengudah Ketuai Pengawa Bepilih PBDS Baru Rapelson Richard Hamit ti madahka parti sida diatu benung nentuka sapa bagi chalun ba tikas ke penudi.
Julius mega madah, bala raban ketuai ba parti nya ngemeratka penemu enggi raban nembiak.
Nya alai ku iya, PBDS Baru tu engkeman alai anak Dayak di menua tu ngentapka diri dalam politik.
“Kitai udah mayuh belajar ari penyilap tuai ke dulu ti suah berebut megai pengawa nyadi ketuai lalu sekeda nya enggai meri awak ngagai raban nembiak mantaika penemu.
“Berindik ari nya, kitai udah tepantup amat enggau pengawa ke udah nyadi ba PBDS ke dulu,” ku iya nerang.
Nambahka jaku iya, Julius madahka parti tu ngembuan kuasa otonomi penuh dalam nentuka kuing parti sereta chalun sida.
Iya madah, sida nadai bepanggai ba kuasa ari menua bukai ba pengawa ngaga pemutus.
“Aku arap mayuh agi nembiak Dayak tebuka runding lalu enda ngembuan penemu nyanda dalam politik laban tu rumah kitai,” ku iya madah baru.
Maya ditanya sekalika iya bisi ati deka bediri ba Parlimen Lanang maya PRU14 tu, iya enda nyemetak nyebut tang semina madahka raban parti sama besukung pangan diri.
“Pajakka Agenda Dayak. Bediri tauka enda tu pekara k dua.
“Semina aku ngarap amat enti bansa Iban ba Lanang enggau Dudong tebuka agi runding sereta beratika enggau silik penuduk Dayak dalam ubah politik kemaya hari,” pia ku iya ti mega Presiden Gerempung Dayak Dudong.