Projek Ngaga Lampu Trafik di Sri Aman tembu nitihka timpuh ditetap
SRI AMAN: Menteri Muda Pengelantang Komuniti Sarawak, Datuk Francis Harden bisi ngabas Projek Ngaga Lampu Trafik Kedua di Sri Aman, di Jalai Sepital enggau betungga enggau Sepitak Sri Aman semak ditu, tengahari kemari.
Harden disempulang Injinir Bagi Menua, Opis Kereja Raya ( JKR) Sri Aman, Bujang Kanang enggau penulung iya, Shahbuddin Abu Bakar udah ngelimpangka awak pengelama 30 minit ngabas pemansang projek nya.
Harden ke mega Kaban Kunsil Nengeri ( ADUN) Simanggang lebuh dirandau madahka pengelantang diri meda projek nya udah tembu digaga nitihka timpuh udah ditetap.
“Pengudah ngabas, aku beratika projek lampu trafik udah tembu digaga lalu deka dikena sebarang maya berengkah ari sehari tu.
“Ungkus ngaga lampu trafik kedua di Sri Aman manggai RM296,874.20,” ku iya lebuhka dirandau.
Ku iya nambah, nitihka timpuh, projek tu udah diletak pengelama tiga bulan ngagai raban kunteriktor dipadu ngempu tanggung- pengawa.
Taja pia ku iya, projek tu tembu tumu agi ari timpuh nya.
“Nitihka timpuh, lampu trafik deka berengkah dikena kena 12 Mei, laban udah tembu tumu, iya deka berengkah tumu agi ari hari bulan diperambu.
“Kereja ngaga lampu trafik udah berengkah 13 Fenuari tu tadi,” ku iya.
Lampu trafik tu kedua iya pengudah keterubah di begunan di Jalai Makit, enda jauh ari Tebing Batang Lupar.