‘PRS ARGO Youth Mobile’ endur ngayanka pekara bekaul parti
SANTUBONG: Raban Nembiak Parti Rakyat Sarawak (PRS) numbuhka aplikasi ‘PRS ARGO Youth Mobile’, ti dipenyadika Presiden iya Tan Sri Datuk Amar James Jemut Masing.
Ketuai Nembiak PRS, Datuk Snowdan Lawan madahka, aplikasi nya deka endur ngayanka semua pekara bekaul enggau parti sereta semina ulih dipeda kaban parti nya.
Iya madahka naka ke diatu aplikasi nya semina bisi di ‘ Google Play’ ungkup ti ngena telefon android.
“Aplikasi tu ulih dipasuk semua kaban PRS serata nengeri. Dalam aplikasi nya deka ngayanka latar belakang, gambar, program sereta semua berita bekaul enggau PRS.
“Semua kaban parti ulih program dalam aplikasi nya. Orang luar ari PRS mega ulih ‘download’ tang sida semina ulih meda berita aja,” ku iya.
Snowdan ke nyadi Kaban Kunsil Nengeri (ADUN) Balai Ringin mansutka pekara nya dalam jaku pengelalu pengerami nutup program ‘ARGO Empowerment’ ti diatur Jawatankuasa Pemuda PRS Pusat ba sebengkah hotel ditu, kemari.
Nitihku iya, naka ke diatu semua kaban PRS serata Sarawak bisi urung 40,000 iku kaban.
Lebuh ke ngenang pasal program ti diatur 13 - 15 April, iya madahka tuju program nya dikena ngelatih sereta meri penemu ngagai raban nembiak parti bekaul enggau atur Pengawa Bepilih.
Iya madahka nya dikena nyikap sereta ngenegapka semua 20 pampang Nembiak PRS betapi enggauPengawa Bepilih Besai Ke-14 (PRU14).
“Ngarapka semua pekara ke udah dipelajar, ditemu maya program tu ulih dipekunsika enggau kaban PRS bukai, lebuh maya pulai ngagai endur diri,” ku Snowdan.
Kelimpah ari nya, Masing ti mega Sapit Kepala Menteri lebuh bejaku ba pengerami nya ngelalau raban Nembiak parti nya maya bekimpin mantaika pekara ke ulih dikereja parti.
Iya madahka nya dikena nyapai juluk deka terus ngetanka semua sitak parlimen ke udah dimenang sereta diungkupka ngagai parti.
“Maya bekimpin anang ngemulaka orang nyangkaum maya PRU tu.
“Sebut meh pekara ke ulih dikereja tauka dipejalaika (parti),” ku iya ngingatka bala Nembiak PRS.
Sama bisi datai ba pengerami nya kemari Menteri Muda UndangUndang & Adat Bumiputea Datuk John sikie Tayai, Menteri Muda Bekal Ai Datuk Liwan Lagang, ADUN Christopher Gira, ADUN Wilson Nyabong, Ketuai Raban Indu PRS Dato Sri Doris Brodie enggau ke bukai. SIBU: Pemesai Opis Kaunsil Pelilih Menua Kanowit Katis Noel Nyabong udah nadai pagi, kemari.
Nitihka dipadah, niang nadai ba Sepital Sibu urung pukul 4 dini hari.
Kediatu niang, 49, udah dibai ngagai rumah iya di Kemuyang ditu.
Niang datai di rumah iya sebedau tengahari.
Niang mega dipadahka deka dianjung kena 18 April ngagai Nirvana Memorial Park.
Sekeda ari pemesai ke bisi datai ngesah penusah rabat niang iya nya penyandang Parlimen Kanowit Datuk Aaron Dagang.
Kelimpah ari nya, bala kunsilor ari Opis Kaunsil Pelilih Kanowit enggau bala bukai nyengkaum raban ari Pusat Khidmat Rela Nanga Ngungun bela datai maya nya.