BN, penyakal sama bisi peluang 50-50 menang ba Puncak Borneo
Siku penganalisis politik melabaka sitak Puncak Borneo deka angat diperebutka maya Pengawa Bepilih Besai Ke-14 (PRU14) ti deka datai.
Iya beratika Barisan Nasional (BN) enggau penyakal bela bisi 50-50 peratus peluang menang ba penuduk nya.
Iya nyemetak madah pengering sida ti ngelakuka diri ungkup penuduk nya ari BN engka tau ngasuh bala penyukung pambar, ti deka nyukung penyakal.
“Di Puncak Borneo, tetiap iku Kaban Kunsil Nengeri (ADUN) bisi chalun (deka bediri minta pilih) sida empu lalu tu tau ngasuh bala penyukung chalun nya pambar, sereta ba pekara tu, aku deka madahka chalun (BN enggau penyakal) deka bisi peluang ke sama ulih menang,” ku iya.
Ku iya nambah, chalun ti betul patut orang ti dikerindu, baruh ati enggau ngelala bala pengundi enggau manah.
Puncak Borneo enggau pengundi bansa Bidayuh datai ari sitak Mambong, Tarat enggau Serembu, dipegai Datuk Dr Jerip Susil, Datuk Roland Sagah Wee Inn enggau Miro Simuh.
Nitih ku iya, penyandang Datuk Seri James Dawos Mamit mega bisi chalun ti dipilih iya empu.
Antara nama ti udah diberita deka bediri minta pilih ba penuduk nya iya nya Wijok Tumik enggau Jeanot Sinel.
Sapit Residen Kuching Tuah Suni enggau Pemesai Pengatur Pengawa Sarawak (SAO) Rangen Jamang mega antara nama ti udah diberita.
Berebak enggau nya, pemerati politik apin lama ke udah madahka BN patut milih orang ti betul bediri minta pilih ba penuduk nya maya PRU14 tu.
Iya bisi dipadah nyebut ke alai diatu bisi penyarut dalam Parti Pesaka Bumiputera Bersatu (PBB)ba kandang menua nya, ti ngujungka kereja siti tim, ukai kelai ke manah ngagai BN.
“Ari pekara ti diperatika aku diatu, siti raban udah bisi chalun lalu raban ke bukai mega udah bisi chalun charut enggau pangan diri lalu nguji ngalahka pangan diri, ke alai tu pemansang ti enda manah.
“Kededua raban tu enda betunga mua, nadai berandau mutarka penyarut lalu enti sema penanggul tu terus nyadi, BN deka napi penusah lenyau Puncak Borneo. Nya alai BN patut milih orang ti betul bediri minta pilih ba penuduk tu (maya PRU14 tu),” ku iya.
Ba bala penyakal, PKR Wille Mongin, ti jelai rita di kandang menua nya, nyauka nyengala nyadi chalun.
Willie kala bediri minta pilih ba penuduk nya nyatup Dawos ba pengawa bepilih besai 2013, tang alah pengudah bulih 10,740 undi, lalu Dawos bulih 20,461 undi.