Chalun BN dipelaba betapi enggau pemar taja pan dipeda bisi pengelebih
KUCHING: Perebut ba kerusi Parlimen P.192 Mas Gading maya Pengawa Bepilih Besai Ke-14 (PRU14) tu dipelabaka mar taja pan ba atas keretas ke mayuh agi meri pengelebih ngagai chalun Barisan Nasional (BN).
Enti nadai chalun ngatika diri (bebas), kerusi Mas Gading dipelabaka deka beratika satup tiga sukut entara chalun BN enggau chalun Pakatan Harapan (PH) sereta Parti Bansa Dayak Sarawak (PBDS) Baru.
Taja pan ba atas keretas, penyandang kediatu, Datuk Anthony Nogeh Gumbek diperatika ulih ngetanka kerusi nya (enti iya dipilih baru), tang pemutus ke enda disadang tau nyadi maya mensia mayuh muai undi kena 9 Mei tu ila.
Nyema deka menang, chalun BN enda tau enda bisi pengulih ngalahka chalun ke kala betangkup iya, ari Parti Tindakan Demokratik (DAP), iya nya Mordi Bimol, alai ke sekali tu, Mordi deka bediri atas tikit chalun Pakatan Harapan (PH).
Lalu siku agi ke dipelabaka deka betangkup ba sitak nya, iya nya Patrick Anek Uren, ti mega nyadi Sapit Presiden Parti Bansa Dayak Sarawak Baru (PBDSB), ke enda tau enda sama dikemeratka.
Ketuai pampang Parti Pesaka Bumiputera Bersatu (PBB) Opar, Asiang Gihep madah, taja pan BN mayuh agi pengelebih di Mas Gad-
Nitihka timbal ari pun menua, aku tau madahka pejalai pengawa bepilih besai nya ila, nyangka bisi pedis mimit ke chalun BN di Mas Gading dalam PRU14 tu taja pan bepeluang deka menang. Asiang Gihep Ketuai pampang PBB Opar
ing tang iya ngaku, pengawa bepilih nya ila ukai jalai ke muntang.
Chalun DAP ku iya, taja pan enda mujur ngerampas kerusi nya maya pengawa bepilih besai sebedau tu, tang pengelebih sida iya anang dikumbai muntang, kelebih agi diatu sida iya sepenemu enggau PH.
“Nitihka timbal ari pun menua, aku tau madahka pejalai pengawa bepilih besai nya ila, nyangka bisi pedis mimit ke chalun BN di Mas Gading dalam PRU14 tu taja pan bepeluang deka menang.
“Tang kami di renggat parti deka mantu beratika chalun BN menang di kerusi ditu maya hari mensia mayuh muai undi, 9 Mei tu ila,” ku Asiang madah lebuh dikerandau kemari.
Asiang nandu baru madahka, penyemak PRU14 enggau ngantung nama chalun ke deka digaga kena 28 April tu ila, injin pengawa bepilih besai PBB Opar diatu udah berengkah dibuka di Stum Muda.
Semua perengka guna kena bekimpin sereta strategi kimpin ku iya, udah besedia nurun bekimpin, lalu semina nganti timpuh bekimpin nya berengkah dipadah pengudah abis pengawa ngantung nama chalun.
Ba penemu Penghulu Zon Stungkor, Jinep Jiheng madah BN dipelabaka ulih menang di kerusi sitak tu taja pan betunga enggau jalai ke pedis alai menang.
Penyandang Mas Gading, Nogeh ku iya, udah mandangka pemanah pengawa iya dalam kandang lima taun tu ke udah, pengudah iya menang di kerusi sitak nya, keterubah iya maya PRU13.
“Rayat kelebih agi pengundi di Mas Gading tu nemu agi ni naka pemayuh pengawa ke udah digaga iya ke rayat ditu, bantu, perengka guna ke baru sereta pemansang ke dibai ulih iya.
“Nya alai, kami ngarapka pengundi landik meda sereta beratika pengawa ke udah digaga ulih penyandang ke- diatu, ngambika sida iya pan landik milih sapa ke pengabis nyulut ba sida iya,” ku Penghulu Jinep.
Ba lansa bukai, chalun PH ke sitak nya, Mordi dipadah ngena palan media rama matak sukung ari rayat.
Trend media rama ke dikena ulih chalun biak nya, diperatika mujur matak bala pengundi kelebih agi ba pekara ke semak enggau rayat.
Ambika chunto, pekara bekait enggau jematan di Kampung Selampit, Lundu ke lalu bedau digaga dalam kandang lebih 10 taun kelimpah ari penanggul bekal ai beresi, tanah sereta mayuh agi pekara bukai.
Enti pekara tu enda diterangka enggau silik ngagai rayat, nya nyangka deka meri empas ngagai pemutus undi tu ila.
Kelimpah ari nya, Kerusi Parlimen Mas Gading, iya nya dua sitak DUN, iya nya N.1 Opar enggau N.2 Tasik Biru, alai kededua sitak nya disandang BN.
Maya PRU13 tu tadi, Nogeh teulihka urung 8,265 undi enggau majoriti 2,156 undi ngalahka tiga iku chalun bukai ke betangkup enggau iya.
Chalun ke pengabis semak besemekih enggau iya, chalun bebas Datuk Dr Tiki Lafe ke kala nyadi Kaban Parlimen (MP) Mas Gading bulih urung 6,109 undi.
Lalu dua iku chalun bukai, Mordi ke bediri atas tikit DAP bulih 5,293 undi lalu Patrick ke nyadi chalun STAR lebuh nya, semina bulih 462 undi.