Idris Bohari agi deka nguji nasit di Saratok maya PRU14

KUCHING: Ex- Sekretari Parti Keadilan Rakyat (PKR)Sarawak, Idris Bohari kemari nyadang iya empu bediri ba kerusi parlimen Saratok maya Pengawa Bepilih Besai ke-14 (PRU14) tu ila, atas tikit chalun ke ngatika diri (Bebas).

Idris, 56, lebuh dikerandau ulih Utusan Borneo madahka iya ngaga pemutus nya pengudah berunding enggau sida sebilik sereta bala bakih iya.

“Aku deka pulai ke Saratok pagila berunding enggau bala penyukung aku, lalu pulai aku ari Saratok ila, aku deka meli pom nyadi chalun,” ku iya.

Idris madahka iya empu pansut ari PKR pengudah niang Pehin Sri Adenan Satem ngangkat sumpah nyadi Kepala Menteri Sarawak, lalu masuk parti Pesaka Bumiputera Bersatu (PBB) ranting Taman Malihah, pengudah iya dibai iloh Kaban Kunsil Nengeri ( ADUN) Tupong, Fazruddin Abdul Rahman.

“Aku deka nyadang aku empu nyadi nyawa rayat ke kempang sereta berani di parlimen ngarika komuniti menua pesisir Saratok ke agi tinggal pemansang, kelebih agi genturung pendiau kami empu, Kampung Kaba ke agi ngena ai telaga, lalu jalai kami agi luchak tetiap kali hari ujan,” ku Idris.

Idris sebedau tu kala bediri atas tikit Keadilan di Saratok dalam taun 1999 teulihka 5,042 undi banding enggau 10,545 ke mujur diulih sepiak ke betangkup enggau iya, niang Datuk Peter Tinggom Kamarau.

Dalam taun 2004, Idris bediri baru di sitak Parlimen Santubong betangkup enggau Datuk Seri Wan Junaidi Tuanku Jaafar, tang semina teulihka 2,030 undi banding enggau 12,590 ti diulih Wan Junaidi.

Dalam taun 2006, Idris sekali lagi nguji nasit iya, alai iya bediri di sitak Kunsil Nengeri (DUN) Pantai Damai ke semina teulihka 3,053 undi tang alah laban penyandang ke diatu, Datuk Dr Abdul Rahman Junaidi ke bulih 5,217 undi.

Nitihka rikod sereta penyulut iya, Idris ke sekali tu nyangka ulih nguyat penuduk barang chalun di Saratok.

Penyandang kerusi Saratok, Tan Sri William Mawan anak Ikom semina mimit aja ngalahka Ali Biju ari PKR sereta chalun ngatika diri (Bebas) Datuk Rosli Abang Paleng dalam taun 2013.

Mawan teulihka 11,600 undi, Ali Biju 9,519 undi lalu Datuk Rosli 681 undi.