Larry deka bediri nengah tikit chalun Ngatika Diri ngerebut penuduk ti kala dipegai apai iya ba Pengawa Bepilih Besai 1999
JULAU: Sitak parlimen Julau deka balat diperebut lebuh siku nembiak bansa China jauh ari menua ulu Kapit, sedia ngambi pulai penuduk majoriti Iban ti puang ditinggalka apai iya ba Pengawa Bepilih Besai 1999.
Enti nitihka perati pekara tu tau dikumbai amat, Julau deka meda betengali alan antara Barisan Nasional (BN) enggau siku ti ngelaban, milih bediri minta pilih nengah tikit Ngatika Diri pengudah juluk iya deka nyadi chalun BN enda nyadi nyata.
Penyandang empat penggal enggau Sekretari Besai Parti Rakyat Sarawak (PRS) Datuk Joseph Salang, 68 taun, disabung parti ngetanka penuduk nya deka besatup enggau Larry Sng Wei Shien, 39 taun, ex-ADUN PRS ungkup Pelagus (Kapit) ke mega ex-Menteri Muda Nembiak (Latih), dalam kabinet betuaika Kepala Menteri lebuh nya, Pehin Sri (diatu Tun) Abdul Taib Mahmud.
Larry ditingkil ari PRS, parti ti ditumbuhka nengah saup apai Larry, Datuk Sng Chee Hua, dalam taun 2007 ketegal ngelaban sebedau numbuhka parti iya empu, Parti Pekerja Sarawak (SWP) ngambika bediri minta pilih nyatup chalun PRS ba penuduk Lubok Antu (Sri Aman) maya Pengawa Bepilih Nengeri (PRN) nyin tadi tang alah. Iya udah nya ninggalka parti nya.
Chee Hua nyadi Kaban Parlimen (MP) Julau pengelama sepenggal ari 1995 ngagai 1999 sebedau Putrajaya minta iya meri jalai ngagai Salang.
Pengagit Larry nyata dipeda deka ngamatka juluk iya nya taja pan mayuh penekul ti patut ditempuh iya.
“Iya nguji deka ningkilka Salang. Endang pengawa chukup mar ba iya laban, keterubah, iya orang luar, siti pekara ba Salang empu, aki ini iya asal ari Bayong di Ulu Sarikei, lalu nyadi sebagi ari sitak bepilih, meseti ditapi tetiap musim bepilih,” ku Sapit Chairman PRS Pampang Meluan, Minggang Jungai ke mega tuai rumah panjai.
“Kedua,iya bediri minta pilih nyadi chalun Ngatika Diri ke mega bansa China ba sitak majoriti Iban ti nyadi kubu tegap BN kenyau ari kelia. Salang diatu nama besai nyadi Sekretari Besai PRS, chairman Kaunsil Penyanding Penemu 1Malaysia Sarawak enggau presiden Balai Dagang enggau Industri Dayak,” ku iya.
Siti pekara agi ti patut diputarka Larry iya nya semaya digaga apai iya lebuh nyadi MP tang bedau dikeamat.
Nitih ku siku agi tuai rumah, Micheal Jantan ari Nanga Baketan, Datuk Sng pemadu dikeingat laban ngemansutka penerang ngemaruhka iya pasal pemudah ngulihka undi Iban.
“Ati kami agi nyima ketegal jaku iya nya. Engka kami patut malas baru ngagai anak iya lalu nunjuk ngagai iya pemar rega undi kami,” ku iya madah ngagai Bernama ditu.
Julau bisi 24,936 pengundi berejista ke datai ari penuduk DUN Meluan enggau Pakan, bela dimenang chalun BN. Pemesai sitak Parlimen nya nyauka sebaka Melaka enggau Perlis enti dipegulai.
Baka sitak bukai di menua pesisir Sarawak, peranak ke diau jauh di menua ulu agi bepanggai ba perengka pengangkut sungai. Taja pia, ujung minggu, penyuntuk endur engkah entukar di pasar Julau enggau Pakan udah chukup ngasuh tusut runding lebuh peranak ti ngasaika akses jalai alun ngasuh pasar sekut enggau entukar sida.
Kebun lada chelum, sawit enggau sayur nyadi batang pemansut belanja peranak menua nya. Salang, siku jurubank sebedau ngaul diri dalam politik, diberi puji besai lebuh nyadi peransang ngagai peranak menua nya enggau iya empu orang ti ngembuan kebun lada chelum ke pemadu besai di Bagi Menua Sarikei, sitak ngeluarka lada chelum tebilang di Sarawak.
Julau deka nyadi sebagi ari sitak bepilih ti matak perati. Ulih enda Larry, nadai sukung ari Pesaka Bumiputera Bersatu (PBB) ti chukup dipebasa, Parti Progresif Demokratik (PDP) enggau Parti Sa’ati Rayat Sarawak (SUPP) menang ba penuduk nya ti kala disandang apai iya?
“Seduai menyanak Sng tu kenyau ari suba ditemu mansutka mayuh belanja dikena bekimpinka ba pengawa bepilih sida. Larry dipadah nerima sukung ari sekeda kaban politik enggau raban sida enda sepenemu enggau sereta enggau bala penyukung iya,” ku tuai rumah Jantan Uchong, ke mega Sapit Chairman PRS Pakan.
“Orang ti gawaka sida nginti pengundi enggau mayuh macham umpan. Raban kimpin Larry udah madahka sida deka bebendar gawa ngambika menang. Kami matau sida enggau silik,” ku iya.
Ke amat, lebuh Salang ngatur pengerami makai lemai serumpu ungkup bala tuai rumah ti ngulu seminar bala ketuai di Sarikei maya ujung minggu, raban Larry mega ngatur pengerami makai lemai di sebuah hotel bukai enggau iya empu nyadi temuai dipebasa. Siti agi pengerami makai lemai barbrkiu diatur sereta di Pakan. Tuju kededua pengerami nya ngambika enda mayuh tubuh datai ngulu pengerami diatur Salang.
Taja pia, semua 61 iti mija ba pengerami ti diatur Salang di sebuah restoren dua ringkat didedat bala penyukung iya. Tebal agi sida ti talukka Salang antara 530 iku tuai rumah ti sedia ngetanka manuk sabung sida.
Ku Micheal Jantan, nadai dikeirauka agi Salang deka ngetanka penuduk nya, tang ku iya, Salang siku orang ti beratka ‘ pemenyana’ lalu tentu deka menang enggau majoriti besai.
Ba pengawa bepilih besai nyin tadi, iya disatup Wong Judat (SWP) enggau Andy Wong ( PKR), ke alai Salang udah menang enggau majoriti 5,955 ari penyampau 16,677 pengundi ti pansut ngundi. — Bernama
Iya nguji deka ningkilka Salang. Endang pengawa chukup mar ba iya laban, keterubah, iya orang luar, siti pekara ba Salang empu, aki ini iya asal ari Bayong di Ulu Sarikei, lalu nyadi sebagi ari sitak bepilih, meseti ditapi tetiap musim bepilih. Minggang Jungai Sapit Chairman PRS Pampang Meluan