SK Engkilili No. 2 udah mujur ngatur program motivasyen ungkup nembiak Primari 6
KUCHING: SK Engkilili No. 2 mujur ngatur program motivasyen “Strive For Excellent 2018” ungkup nembiak Primari 6 ba sekula nya di Engkilili.
Kaban Kunsil Nengeri ( ADUN) Engkilili Dr. Johnichal Rayong Nyipa ngelalau apai indai ngambika besaup enggau pengajar tauka sekula beratka pekara pelajar anak.
Iya madahka apai indai patut nyambut manah sereta meri sukung ngagai program ke diatur pengajar, sekula enggau Gerempung Apai Indai enggau Pengajar (PIBG).
“Apai indai enda tau enda beratka pelajar anak, anang semina ngelakka pengajar 100 peratus ngajar anak, apai indai enda tau enda bisi kerejasama enggau piak sekula, pengajar enggau PIBG.
“Baka program ke diatur tu, tu chukup manah laban program tu meri peransang ngagai nembiak ngambika lebih bisi runding sereta bisi motivasyen deka belajar,” ku iya bejaku ba program nya apin lama.
Program nya dipasuk 28 iku nembiak Primari 6 ke ngambi Ujian Penilaian Sekolah Rendah (UPSR) 2018 sereta digulu apai indai.
Program nya diatur PIBG, enggau juluk dikena ngangkatka pemanah pemutus nembiak dalam UPSR, ku Kepala Pengajar sekula nya, Ajan Embang.
“Sekula ngarapka peratus nembiak bulih pemutus ti manah ba UPSR ulih dikemanahka agi taun tu,” ku iya seraya beterima kasih ngagai Rayong ti bisi meri bantu belanja dikena ngemujurka program nya.
Kelimpah ari nya pemesai PPD Lubok Antu, Thomas Kanyan mega meransang nembiak ngambika belajar bebendar ngambika nyapai penyulut ba peresa.
Iya mega ngegalau apai indai terus meri kerejasama ngagai bala pengajar tauka sekula berindik ari pekara pelajar ti pemadu beguna ngagai anak dudi hari.