KRT Bagi Menua Sri Aman dibagi ngagai dua pelilih menua

SRI AMAN: Pemisi Kawasan Rukun Tetangga (KRT) di Bagi Menua Sri Aman udah manggai 54 buah, dibagi ngagai dua pelilih, Pelilih Sri Aman enggau Pelilih Lubok Antu, naka diatu.

Menteri Muda Pengelantang Komuniti Sarawak, Datuk Francis Harden madahka ba sitak Bepilih Kunsil Nengeri (DUN) Simanggang bisi 24 seraya Skim Rondaan Sukarela (SRS) bisi 18 udah ditumbuh.

“KRT Ulu Undop Zon 2 nyadi KRT ke pemadu baru dikemendar. Bisi mega KRT ti diperambu aku agi dalam atur dikemendar ari raban Indu Opis Opis Penyerakup Bansa Enggau Intergrasyen Nasional ( JPNIN) di Putrajaya iya nya KRT Sungai Tenggak enggau Ulu Undop Zon 1.

“Berebak enggau nya, aku diatu benung merambu sereta berandau enggau bala pemesai ari JPNIN Bagi Menua Sri Aman ngemesaika bungkur KRT kelebih agi di sitak DUN Simanggang tu,” ku iya.

Harden ke mega ADUN Simanggang mansutka jaku nya lebuh bejaku ngelan- charka KRT Ulu Undop Zon 2, Sri Aman di Rumah Bandi, Sebangkoi Undop semak ditu bedau lama udah.

“Ari pemisi KRT di DUN Simanggang tu, aku ngarap sida ti dipilih gawa dalam komiti ila meseti bejalaika pengawa ngintu, ngemanah enggau ngenegapka penyerakup enggau pengelantang komuniti pupu bansa nadai ngira umur enggau bansa.

“Ba menua Malaysia dikesayau tu, kitai meseti ngenegapka penyerakup enggau pengelantang bansa belalauka Konstitusyen Perintah Be- sai, Rukun Negara enggau Gagasan 1 Malaysia,” ku iya nerang.

Ku Harden nambah, ngaul pekara pemujur enggau pemansang kemaya hari, mayuh udah dijapai perintah ba semua pekara pemansang dalam mayuh bengkah bidang baka pekara rama, ekonomi, pelajar enggau pengerai. Semua tu pengawa ti manah dipejalai raban perintah ngatur pengelantang komuniti di menua Malaysia tu.

“Kitai nyadi rayat Malaysia patut nerima pengawa dipejalaika perintah sereta pen- giruh bala ketuai kitai gawa ngintu pengelantang rayat ungkup penyerakup dalam menua kitai lalu enda ngenang pengawa ti udah dipejalaika perintah,” ku iya.

Nya alai, ba pekara menua Malaysia diuan pupu etnik, jaku tu tentu mai reti sereta pangka dalam ba pengawa nempa menua bansa dalam penyerakup etnik.

Ari pemisi menua ti likun, rayat patut ngayanka ulah bebasaka pangan diri lalu ngemeranka prinsip Rukun Negara ba diri empu sereta pekara pemadu beguna ner- enakka ulah talukka bala pemerintah.

“Kebuah pia laban tu mih chara ngempung semua kitai datai ari pupu etnik nyadi sebuah menua bansa ti tegap dalam pengelantang komuniti dalam Malaysia. Dikena nerenakka penaluk meseti berengkah ari mit,” ku iya nambah.

Sama bisi datai Pemesai JPNIN Bagi Menua Sri Aman, Ahmad Noorkamal Abdul Malek, Chairman KRT Ulu Undop Zon 2, Kunsilor Gerunsin Nyelang, Tuai Rumah Bandi sereta bala bukai. SIBU: Indu dara bansa Dayak enggau beumur antara 18 ngagai 30 diperansang ngambi bagi dalam pekit Kumang Gawai Dayak renggat Bagi Menua Sibu ti deka diatur ba Palan Sivik ditu, kena 26 Mei, berengkah urung pukul 6 lemai.

Pekit diatur nyerumba Gawai Dayak dipelaba deka dipenyadi Sapit Kepala Menteri Datuk Amar Douglas Uggah Embas.

Nadai bayar ungkup bala pesereta pekit.

Pengari komiti pengatur, Angelyn Uchi Maseng madah, semina sida abis nadai lima kaki dua inchi peninggi aja patut enggau bepekit.

Kreteria diakim: Pemajik Gamal (60 peratus), Pekayan (15 peratus), pemanah raras tubuh enggau pengandal diri empu (25 peratus).

Haribulan ke penudi iya nya 11 Mei, urung pukul 5 lemai.

Sentang perais ku Angelyn, kumang deka nerima perais mata duit RM1,500 disempulang trofi enggau hamper lalu penuduk kedua deka nerima RM1,200 enggau penuduk ketiga, RM1,000.

Penuduk ketiga enggau keempat bela deka nerima RM300 enggau RM250.

Mega bisi lima perais sagu ati iya nya RM150 siku.

Penerang silik, tau telefon nuju Angelyn ba lumur 0168825861 tauka Senorita Salleh (013-8061265) tauka Claudia Dieo (019-8346803).