Lebih 100 iku volunteer ngelimpangka diri meresi pantai Bako
KUCHING: Sarawak Forestry Corporation (SFC) Sdn Bhd ngintu Hari Bumi 2018 enggau Genap Taun Ke-60 penumbuh Taman Negara Bako nengah atur aktiviti meresi pantai di Telok Assam enggau Telok Paku di Taman Negara Bako.
Lebih 100 iku volunteer udah ngelimpangka diri pagi Hari Enam ngambi bagi ba aktiviti ti ngayanka pematut ngintu biodiversiti lalu nempa pemeresi rampa menua.
Setipak enggau rambai jaku ‘End Plastic Pollution’, pengawa sehari nya meda pantai ke pemanjai 1.6km udah diberesi. Bisi 440.5 kg uras udah dibuai ari Pantai Telok Assam enggau Pantai Telok Paku, besepiak enggau kandang tebing tasik.
Nitih ku Pemangku Ketuai Pemesai Eksekutif SFC Sdn Bhd, Zolkipli Mohamad Aton, gelumbang tinggi nabanka baru mayuh uras enggau reba ninting hari.
Tebal agi uras ba pantai nya datai ari genturung pendiau ngelingi ti semak enggau Muara Tebas enggau Muara Buntal.
“Aku berasai lantang ati ngambi bagi ba pengawa meresi pantai ditu di Taman Negara Bako. Tu pantai ti manah lalu ngembuan perengkaguna matak penatai peranak menua tu enggau bala temuai, endang patut diintu kitai. Pengawa ke baka tu mantu nambahka penyedar ba empas uras marin enggau pemesai guna pengawa ulih ngintu pantai baka Telok Assam enggau Telok Paku ke seruran ulih diasaika semua. Temuai ke datai mega patut besaup nyaga pemanah rampa pantai Bako,” ku iya nambah.
Taman tu, ditumbuh dalam taun 1957, urung 37 km ari Kuching lalu betunga enggau Tasik China Selatan ti besai. Palan tu bisi jauh mimit, semina ulih dilawa ngena bot laju aja. Taja pia, taman tu nerima penatai temuai enda kurang ari 50,000 ninting taun, kelebih agi ari menua tasik.