Dua projek beungkus RM180 juta deka ngelantangka peranak di Kpg Kupang
SARATOK: Lebih 1,000 iku peranak ba kandang menua Kampung Kupang ditu deka ngasaika pengelantang enggau penumbuh dua bengkah projek ke beungkus RM180 juta.
Projek tu mungkur pengawa jematan 300 meter ngelawa pasar Saratok ngelayang Sungai Krian ti beungkus RM90 juta enggau projek ngemanahka jalai ari Kampung Kupang ke Simpang Bajau, urung 20 kilometer, bela beungkus RM90 juta.
Ungkus dikena ngaga jematan nya nyengkaum projek jalai ngelawa rumah panjai kelimpah genturung pendiau di Kampung Kupang.
Menteri Muda Jalai Menua Pesisir Datuk Julaihi Narwawi madah, projek nya digaga nengah Opis Menteri Menua Pesisir enggau Kandang Menua (KKLW) lalu diatu benung ba tikas ngelangkar pelin projek.
Projek nya ku iya udah dikemendarka Menteri Besai Datuk Patinggi Najib Tun Razak maya program ‘Walk About’ di Pasar Saratok kena 2 Mei 2016 suba.
“Udah dilangkar projek tu deka berengkah digaga lalu projek tu dipelabaka deka tembu ujung taun 2022.
“Projek tu deka mai pengelantang ngagai peranak menua tu ari 250 buah genturung pendiau enggau 11 buah rumah panjai,” pia ku iya madah ngagai pengarang berita ba Dewan Kampung Kupang ditu, kemari.
Iya mantaika jaku tu sepengudah ngabas taba projek nya.
Juhaili madah, penembu projek tu ila tau bendar nyungkakka tikas penatai pemisi rayat dia lebih agi sida ke diau sepemanjai jalai menua pesisir di sitak Betong.
Ku iya, jalai nya ila deka ngemuntangka penyauh ari dua jam ngelama tu ngagai 30 minit aja ari Kampung Kupang ngelawa pasar Saratok.
“Kitai deka ngemeratka pengawa ngangkatka penatai pemisi rayat di rumah panjai enggau genturung pendiau ba menua pelilih Saratok.
“Nambahka nya, projek tu tau bendar ngemuntangka pejalai mensia mayuh ngelawa jalai Pan Borneo,” ku iya madah baru.
Ku Juhaili, penatai ngabas taba projek baka nya endang semampai dikereja belama tang ukai ketegal pengawa bepilih ti nyauka semak.
Pengawa betemu enggau rayat nya ku iya tau mai macham pengelebih ngagai rayat ke diau di menua pesisir.
Sama bela datai nyempulang iya maya tu iya nya Kaban Kunsil Nengeri ( ADUN) Kelaka Datuk Abdul Wahab Aziz, ADUN Kabong Mohd Chee Kadir, Residen Betong Friday Belik, Pegawai Opis Pelilih Saratok Mohd Ikhmal Abdullah, injina Opis Kereja Raya (JKR) Betong Mehan Jorai sereta bala bukai.