Manifesto Pemuda BN ngipak kuing Transformasi Nasional 2050
KUCHING: Manifesto pemuda Barisan Nasional (BN) ngipak peneka sereta pengarap menua nuju ngagai kuing Transformasi Nasional 2050 (TN50).
Eksko SABERKAS Menua, Abang Abdul Aziz Abang Draup madah manifesto pemuda BN nyadi perambu ke ulih dikena dalam timpuh ke panjai, beratika bala nembiak bisi pengelantang pendiau ke bekualiti.
“Lapan pekara ke berat tauka jamin dalam manifesto nya, ngenegapka bala nembiak sereta betatika penanggul ke dibantai ulih bala nembiak.
“Pekara baka peluang pengawa, gaji ke sama rata, pengelantang pendiau maya udah belaki tauka bebini, bantu pengawa dagang sereta perengka guna, ke semua nya bisi dikemeratka dalam manifesto tu.
“Ukai semina perambu dalam kandang lima taun tu aja, tang manifesto tu ngamatka peneka sereta pengarap menua nuju ngagai kuing TN50,” ku iya.
Aziz nandu baru madahka ari sukut ekonomi, manifesto tu nyamin peluang pengawa latih sereta pengawa ngagai bala nembiak kelimpah ari nambah pemun perengka guna bukai.
Pengawa ngenegapka bala nembiak di mengeri enggau menua pesisir deka beratika raban nya nyadi serak gaya dudi hari ila, deka ngembuan pengelantang pendiau ke bekualiti sereta manah agi.
Ba lansa nya mega, Sekretari Pemuda SUPP, Milton Foo madah manifesto pemuda BN tauka Jamin Bala Nembiak, siti danji ke diberi ngagai pengundi biak kena nyapai empat pemerat nya.
Empat pekara ke nyadi pemerat pengundi biak menua tu iya nya ngembuan pemisi ke besai, peluang pengawa, kualiti gaya pendiau sereta ngembuan politik ke stabil.
“Ambika chunto baka Kaul Kelala Nembiak ke ngaga pengawa Dagang (Pengena- lan Jaringan Keusahawanan Belia) nengah YEN.GOV. MY, bisi nyendiaka palan sekali ngetu ke nembiak ke bedagang, ngambika sida iya muntang ngulihka bantu sereta geran ari ijinsi bukai.
“Manifesto tu mega nyamin ngurangka bungai maksima sereta caj laun mayar kad kredit, nambah skim rumah ke ulih dibeli sereta mayuh agi ke nagit mantu bala nembiak.
“Enti semua pekara tu digaga baka ke disemaya dalam manifesto pemuda BN, tu tentu deka ngurangka penusah wang ba bala nembiak kelebih agi ke diau di sitak mengeri,” ku iya.