Riot: Umur 67 nadai nyadi penanggul terus meri servis gawaka rayat

TEBEDU: Penyandang sitak parlimen Serian, Dato Sri Richard Riot Jaem deka nemu kebuah sekeda peranak pelilih nya ngenggaika iya sekali agi nyadi pengari rayat sida.

Kebuah pia ku Riot, ba umur 67 taun iya mengkang ngasai diri agi biak lalu seruran keran deka meri servis ngagai rayat.

Jaku nya dipansut pengudah Riot ngasai bisi sekeda peranak Serian ngenggaika iya disabung ngenanka par- limen Serian ba Pengawa Bepilih Besai Ke-14(PRU14) tauka sekali agi dipilih nyadi Kaban Parlimen(MP) ketegal ti udah tuai mangku pengawa nya.

Beambika chunto Chairman Pakatan Harapan(PH) Tun Dr Mahathir, ex-menteri besai nya ku Riot mengkang deka nyadi menteri besai tajapan umur udah manggai 93 taun.

“Enti iya(Tun Mahathir) mengkang keran deka meri servis ngagai rayat ba umur nya, nama kebuah aku enda ulih.!

“Aku mengkang ulih ngemujur tanggungpengawa nyadi pengari rayat lalu aku jauh biak enti dibanding enggau Tun Mahathir,”ku Riot.

Iya mansutka jaku nya rambau ngelanchar ‘Program Mesra Bersama Masyarakat’ di Balai Mensia Mayuh Tebedu ditu, kemari.

Rambau pengerami iya mega ngarap pengundi di serian milih enggau manah enti sida dekaka pemansang datai ba kandang endur sida.

“Maya aku nyadi MP Serian, aku udah mai mayuh pemansang ditu. Aku mega udah mantu nyendia perengka guna di Serian lalu aku ngarap peranak Serian ingatka aku,” ku iya.

Ketegal pia, iya pechaya peranak Serian deka milih pengari ke patut rambau PRU14 kena 9 Mei tu.