PAS pechaya ulih menang siti ari lima penuduk parlimen di S’wak
KUCHING: Parti Islam SeMalaysia ( PAS) udah netapka deka bediri di lima kerusi parlimen lalu ke sekalitu, mantaika dua mua baru di kerusi Parlimen Sarawak maya Pengawa Bepilih Besai ke-14 (PRU-14) tu.
Dua chalun mua baru nya, Hamdan Sani, 31, ke deka bediri di kerusi Parlimen Petra Jaya enggau Zulaihi Bakar,49, kerusi Parlimen Sibuti.
Tiga iku chalun PAS bukai, Zulkipli Ramzi, 40, ( Kota Samarahan), Asan Singko, 64, (Batang Sadong) enggau Wan Abdillah Wan Ahmad, 46, (Batang Lupar).
Pengawa ngerintaika chalun PAS ba atur pengawa nya, hari Enam tu tadi, dipunka ulih Presiden PAS Datuk Seri Abdul Hadi Awang di Opis Pemadah PAS Sarawak, Matang Jaya ditu, kemari.
Kesemua nama chalun nya dirintaika ulih Sekretari PAS Sarawak ti mega mangku pengawa nyadi Sapit Ketuai Direktor Pengawa Bepilih Indu Opis PAS Mukhtar Suhaili.
Ba aum pengarang berita nya kemari, Abdul Hadi madahka iya pechaya PAS Sarawak ulih menang pengabis kurang pan siti kerusi parlimen di Sarawak maya PRU-14 tu ila.
Iya nandu baru madahka, tu berindik ari persin undi ke dijapai maya Pengawa Bepilih Menua ke udah mandangka mayuh pengundi ari rebak baru.
“Aku pechaya PAS ulih, pengabis kurang pan siti ari lima kerusi parlimen ke deka alai sida iya bediri di Sarawak.
“Tang aku enda ulih madahka ni bagi kerusi ke ulih menang nya laban nya strategi kami deka menang,” ku iya.
Sama bisi enggau ngulu aum pengarang berita nya kemari, Kepala Direktor Pengawa Bepilih Indu Opis PAS, Dr Ahmad Samsuri Mokhtar enggau Pesuruhjaya PAS Sarawak Jofri Jaraiee.
Aku pechaya PAS ulih, pengabis kurang pan siti ari lima kerusi parlimen ke deka alai sida iya bediri di Sarawak, tang aku enda ulih madahka ni bagi kerusi ke ulih menang nya laban nya strategi kami deka menang. Datuk Seri Abdul Hadi Awang Presiden PAS