Pesta Engkilili pelasar manah endur ngelakuka produk ditempa diri empu
ENGKILILI: Peranak ditu dilalau ngena memanah awak Pesta Engkilili 2018 ti benung diatur diatu nyadika pelasar dikena sida ngelakuka produk diri empu.
Nitih ku Kaban Kunsil Nengeri (ADUN) Engkilili Dr Johnical Rayong Ngipa, minta komuniti di menua nya bejualka produk ketegal pengeran iya deka meda sida ulih ngangkatka penatai pemisi ekonomi diri ari fokus ba produk betanam betupi.
Kebuah pia laban ari fokus ba produk betanam betupi seriris enggau juluk Kepala Menteri Datuk Patinggi Abang Johari Tun Openg deka ngemansangka pengawa betanam betupi nyadi siti ari pemansut belanja nengeri tu.
“Tanam mayuh agi utai tanam dagang baka sawit, lada, koko, getah enggau ke bukai. Aku pechaya peranak Engkilili agi tubah tanah bedau diperimba betanamka semua bansa utai tanam dagang baka tu,” ku iya nambah lebuhka bejaku ngelancharka pengerami diatur di Dataran Rusa, pasar Engkilili, Hari Minggu tu tadi.
Ba lansa pengerami ke sama, Rayong mega madahka peranak Engkilili patut meri terima kasih ke alai perintah mujur meri sida nyauka 100 peratus bungkur menua bisi bekal kuasa karan enggau jalai penyambung.
Pekara pemadu beguna ngagai peranak Engkilili diatu iya nya kenang sapa bagi ngemai pemansang nya lalu sida patut malas maya Pengawa Bepilih Besai Ke-14 (PRU14) diatur dalam bulan baru tu.
Pesta Engkilili 2018 udah dipenyadi Dr Rayong enggau penyandang Parlimen Lubok Antu Datuk William Nyalau Badak.
Nitih ku Rayong, batang tuju pengerami dikena ngerapitka kaul antara mayuh bengkah komuniti di sitak Engkilili sereta ngelakuka pasar Engkilili nya empu.
Raban pengatur pengerami mega madahka Rayong udah melanja sebuah motosikal ny- adika perais besai chabut tikit benasit rambau pengerami nya.
Kelimpah ari nya, pengatur pengerami mega madahka Rayong udah ngagihka belanja penyampau RM75,000 seraya Nyalau meri RM50,000 dikena melanja pengerami nya.
Pengerami ke benung diatur diatu, berengkah ari 22 nyentuk 27 April di pasar Engkilili.
Mayuh aktiviti benung diatur nyerumba pengerami baka mayuh macham pekit, tanya saut, ngangauka bala penyanyi di menua tu merindang ba pengerami, pekit pemajik, pengawa mandang enggau mayuh ke bukai.