Nembiak Dayak ke nyulut UPSR, SPM enggau STPM tau nguji minta DSEA
MIRI: Bala nembiak sekula bansa Dayak ti nyulut ba peresa UPSR, SPM enggau STPM diperansang nganjung pinta ungkup Anugerah Pelajar Nembiak Dayak (DSEA) ti diatur Komiti Gawai Dayak Bagi Menua Miri.
Anugerah tu deka disua maya Pengerami Makai Lemai Gawai Dayak Bagi Menua Miri 2018 deka diatur di Meritz Hotel kena 19 Mei tu. Pengerami makai lemai taun tu diatur Serakup Dayak Bidayuh Nasional (DBNA) Miri.
Nitih ku Koordinator Pemadah Komiti Caroline Siburat, anugerah pelajar tu tebuka ngagai semua nembiak sekula bansa Dayak ti nyulut dalam peresa UPSR, SPM enggau STPM sida dalam taun nyin tadi.
“Bala nembiak sekula meseti penakan Dayak, ke alai abis nadai siku ari apai indai iya nya bansa Dayak.
“Patut nerima anugerah tu, sida meseti teulihka abis nadai 5A ba UPSR, 8A SPM lalu 3.3 CGPA ba pemutus STPM sida,” ku iya seraya nambah, anugerah tu semina sida ti ngambi peresa di sekula dalam Pelilih Miri aja.
Sida ti tetangkupka kriteria disebut tau nganjung penerang diri enggau salin slip pemutus ngagai raban pengatur kena 24 April (sehari tu). Bala sida tau betanya ngagai Chairman Komiti Mit Pelajar, Bernard Ralphie ba lumur 0198554282 tauka Rumah Dayak ba lumur 085-435467 ungkup penerang silik agi.
Kelimpah ari anugerah pelajar, batang pengerami makai lemai besai kena 19 Mei tu deka ngatur pekit Dayung Sangon, Kumang Iban, Keligit Orang Ulu enggau Keling/ Belawan Gawai 2018 Bagi Menua Miri.
Tikit berega RM600 enggau RM800 semija ngaul 10 iku diatu benung dijual. Sida ke bisi ati bebelika mija tau telefon nuju Chairman Komiti Pengatur Captain Bernard Idit ba lumur 016-4454854, Caroline Siburat (012-8518938) tauka Rumah Dayak (085435467).
Aktiviti bukai bela deka diatur nyerumba pengerami Gawai Dayak Bagi Menua Miri baka pengawa meri darah diatur di Emart Riam kena 5 Mei (raban ngempu pangku pengawa - Mathew Madai (013-8377297); Pekit Karaoke Lagu Dayak (Captain Bernard 016-4454854 enggau Nancy Ribid 016-8005889); Pekit Ngelinsu Nembiak Mit di Bintang Megamall kena 12 Mei (Belinda Khoo 013-8299243) sereta pejalai nemuai pengasih ngagai Sepital Miri.