PRS enggai bisi kaban enda meri kerejasama sereta enda talukka parti
KUCHING: Parti Rakyat Sarawak( PRS) enggai bisi kaban ti enda meri kerejasama sereta enda talukka parti, Ku Presiden Tan Sri James Masing.
Iya mansutka penerang nya nyaut tanya pemberita sentang pemutus ningkilka Sapit Presiden Datuk Joseph Entulu enggau Mandal Presiden Datuk William Nyallau sereta 3 iku kaban Kaunsil Besai parti ke bukai.
Berindik enggau nya iya pechaya semua enam chalun PRS nyengkaum chalun baru Robert Pasang Alam(Lubok Antu) enggau Rita Insol( Selangau) ulih nempa pemujur ngagai Barisan Nasional(BN).
“Aku meri jaku puji ngagai Menteri Besai Datuk Seri Najib Tun Razak enggau Kepala Menteri Datuk Patinggi Abang Johari Tun Openg ketegal pechayaka aku sereta PRS nengah atur nerima semua chalun ke dianjung parti ungkup PRU14.
“Diatu mih maya ke alai kitai meseti nentuka pemujur ba semua enam penuduk ungkup Menteri Besai.
“Aku udah ngaga semaya nya,’ku Masing ke alai dulu agi ari nya iya nyempulang Abang Johari mantaika rintai chalun BN Sarawak di Indu Opis Parti Pesaka Bumiputera Bersatu(PBB) di Jalai Bako ditu, kemari.
Ditanya sekalika PRS deka napi pemar pengudah ningkilka kededua Entulu enggau Nyallau, Masing semina madah seduai bisi hak bediri minta pilih ketegal menua tu meranka atur demokrasi.
Kelimpah Entulu enggau Nyallau, tiga iku ke bukai ke ditingkil kena malam Hari Minggu tu tadi iya nya Nyempah Sabut, Adriana Chumang enggau Edward Kurik.
“Ungkup Chalun PRS, aku udah berandau enggau kededua Menteri Besai sereta Kepala Menteri. Aku dulu betemu enggau Najib ketegal Abang Johari ngasuh pia.
“Kededua Najib enggau Abang Johari nyukung chalun ke deka disabung PRS,’ku Masing.
Masing ke mega Sapit Kepala Menteri madah ulah Entulu baka ke iya mengkang dipilih nyadi chalun.
Ku iya, ulah nya ngasuh aku alit ati lalu engka bisi pekara ke nyelai ‘magic’ bisi nyadi, enti enda pia enda iya kelalu pechayaka diri.
“Nya mih kebuah aku ngena leka sebut ‘MIRACULOUSLY’ ke mai reti ‘magic’.., aku pan enda nemu sekalika pekara ‘magic’ nya nyadi,’ku iya.
Ba sentang genteran jaku “Siapa makan cili, dia rasa pedas”, Masing madah nya dituju ngagai bala ketuai enggau kaban kunsil besai ke udah ditingkil.
“Sida udah ngelaban parti sereta BN lalu ketegal nya sida nerima ukum. Sida mih ke ‘makan cili’ lalu kemari sida ngasaika ‘ pedas’,’ Ku Masing.
Parti ngenanka Datuk Masir Kujat di sitak parlimen Sri Aman, Datuk Wilson Ugak(Hulu Rajang), Datuk Joseph Salang( Julau) enggau Datuk Aaron Dagang di Kanowit.