Teknologi baru deka dikena merambu pemansang mengeri, ku Abang Johari
KUCHING: Nengeri tu deka ngemeranka teknologi baru dalam perambu mengeri nyengkaum sistem parit, dikena mutarka penanggul bah ti nyadi ba mengeri tu.
Kepala Menteri Datuk Patinggi Abang Johari Tun Openg madahka, projek Pembangunan Lembangan Sungai Bersepadu ( PLSB) Sungai Sarawak engkeman amat dipejalaika dikena mutarka penanggul ampuh bah ke nyadi ba nengeri tu kelebih agi di mengeri Kuching.
“Kitai di mengeri Kuching pemansang chukup jampat, kekadang aku meda nadai perambu ti silik dalam pemansang mengeri kitai laban kitai kekadang enda ingatka pekara parit.
“Terus terang aku madah ngagai kita, ba kandang genturung pendiau di Kota Samarahan bisi rumah teres tang parit enda nemu nuju ni, deka madahka diparit enda putus ba tetengah, ai pan rarat ke bukai.
“Nya alai chara kitai diatu deka ngena teknologi baru iya nya ‘mapping’, reti iya kitai nemu kini tuju parit nya tauka kini tunga ai nya anyut,” ku iya.
Abang Johari mansutka pekara nya dalam aum pengarang berita sereta maya bejadika projek Pembangunan Lembangan Sungai Bersepadu ( PLSB), Sungai Sarawak ke diatur Opis Menteri Pengeraja Asal enggau Rampa Menua ba Dataran MJC, Batu Kawa ditu, ensanus.
“Kitai bejalaika tu ( teknologi baru) ngambika enda anyut ngagai endur bukai. Tu mih kerejasama kitai enggau perintah besai kelebih agi ungkup mengeri Kuching, Samarahan sereta mengeri bukai ke semak,” ku iya.
Iya madahka ngena teknologi mapping nya Unit Perambu Nengeri ulih ngaga perambu sereta ngemansangka rumah, kandang komersial ti beratka sistem parit ngambika nadai ai betakat ke ulih ngujungka ampuh bah.
Kedua ku Abang Johari, tebal agi mengeri kitai besemin tauka dibelakin ti ngujungka ai enda ulih tama ke dalam tanah ke lalu ngujungka ai betakat lalu ampuh bah pan nyadi.
Baka penyadi ba sepital, Padang Merdeka enggau Jalai Ban Hock ti pemadu balat enda nemu kini tunga ai parit nya anyut lalu lebuh hari ujan mimit dia ai betakat ti ngujung ampuh bah nyadi, ku iya.
“Nya alai kitai deka ngubah pemansang kitai mimit. Lebuh kitai ngena teknologi baru enti ba endur ke besimen pan ai ulih tama ke tanah. Enti enda pan kitai ngaga pegung dalam mengeri, ngambika ai nya tama ngagai pegung,” ku iya.
Kelimpah ari nya Abang Johari mega madahka perintah nengeri ngemendarka belanja sepenyampau RM5 juta dikena ngaga tebing ai ba Batu Kawa.
Tebing ai ba Batu Kawa nya dikearapka ulih nyendiaka palan endur ngelantang ati mensia mayuh kelimpah endur bejalaika aktiviti bepengerai, ku iya.
“Aku ngemendarka RM5 juta dikena ngaga tebing ai ba Batu Kawa,” ku iya seraya nyaut peminta Dr. Sim.
Sama bisi datai Menteri Pengeraja Asal enggau Rampa Menua Datuk Seri Wan Junaidi Tuanku Jaafar, Ketuai Sekretari Opis Menteri pengeraja Asal enggau Rampa Menua Dato Sri Azizan Ahmad, ketua Pengarah Jabatan Pengaliran dan Saliran Malaysia Dato Ir Dr Md Nasir Md Noh, Direktor Opis Parit enggau Ent ali Ai Sarawak Chok Moi Soon enggau ke bukai.