Palan Ngantung Nama di Sri Aman udah sedia, ngarapka gaya hari manah: Philip
SRI AMAN: Proses ngantung nama Pengawa Bepilih Besai Ke-14 (PRU 14) ba semua sitak serata Malaysia nyengkaum 31 Parlimen ba Sarawak, berengkah dipejalaika pukul 9 pagi sehari tu.
Berebak enggau nya, Utusan Borneo lebuh ke ninjau Palan Ngantung Nama Parlimen Sri Aman ba Opis Residen Sri Aman kemari, Pemesai Pengawa Bepilih sitak tu, Philip Peter Salam madahka sida udah sedia napi proses ngantung nama sehari tu.
“Semua udah sedia sereta disediaka magang, ngarapka pagila (sehari tu) gaya hari manah.
“Aku gaga ati laban kami udah sedia amat lalu senario ba Sri Aman ditu manah amat,” ku iya lebuh dikerandau Utusan Borneo.
Ba palan ngantung nama Parlimen Sri Aman, dipelaba bisi tiga chalun datai ngantung nama iya nya ari Barisan Nasional (BN) ti mega penyandang Datuk Masir Kujat, Parti Bansa Dayak Sarawak Baru (PBDSB) Cobbold John enggau Parti Keadilan Rakyat (PKR), Norina Utot.
Bepelasarka ripot Opis Pengemata Gaya Hari Malaysia ba Sarawak sehari tu muak ke pagi gaya hari sehari tu dipelabaka nadai ujan sereta muakka lemai sekeda endur dipelaba bisi ujan enggau biau balai.
Dewan Rakyat direrak kena 7 April laban meri awak Pengawa Bepilih Besai (PRU) sereta Pengawa Bepilih Kunsil Nengeri (PRN) ungkup Sabah enggau Semenanjung Malaysia, diatur.
Undi tumu deka diatur 5 Mei lalu muai undi ke Pengawa Bepilih Besai Ke-14 diatur kena 9 Mei.
Ba PRU14, rejista pemilih suku keempat 2017 dikena ti bisi 14,940,624 pemilih berejista.
Ari penyampau nya 14,636,716 iya nya pemilih biasa, 300,255 pengundi tumu ti nyengkaum raban soldadu enggau laki/bini sereta polis enggau 3,653 pengundi enda datai ngundi laban di menua tasik.
Sarawak aja, rejista pemilih PRU14 ti digazet kena 10 April 2018 bisi 1,220,960 pemilih.
Ungkus belanja dikena ngatur PRU14 dipelabaka sepenyampau RM500 juta sereta mungkur 259,391 petugas pengawa bepilih.