SPR netapka jam Ngantung Nama Chalun berengkah ari pukul 9-10 pagi sehari tu
KUCHING: Atur Pengawa Bepilih Besai Ke-14 (PRU14) di Sarawak berengkah seharitu, iya nya hari Ngantung Nama Chalun ke beratika ke semua 31 palan ngantung nama chalun di serata menua belabuh dibuka ari pukul 9 pagi.
Opis Pengawa Bepilih (SPR) netapka timpuh jam nganjung Keretas Ngantung Nama Chalun berengkah ari pukul 9 pagi datai ngagai pukul 10 pagi lalu Keretas Ngantung Nama Chalun ke udah tembu di isi enggau betul, tau disua ngagai Tuai Pengawa Bepilih Besai Parlimen, baik ari chalun, penyukung enggau penganjung nama chalun.
Enti baka ke udah, tetiap kali bisi pengawa bepilih baik nya nengeri tauka parlimen, tetiap chalun ke datai nya, disempulang ulih penyukung sida iya ke sama ngulu ngagai palan ngantung nama.
Pengudah nya, tuai pengawa bepilih besai ke tetiap sitak nya deka madahka chalun ke ulih bediri enti sema bisi semekih.
Haribulan muai undi udah ditetapka kena 9 Mei 2018 lalu baka ke di Sarawak, urung 1,220,96 tauka lebih 1.2 juta pemilih ke udah ngerijista sida iya empu, dibagi ngagai 607,410 tauka 49.75 persin nya lelaki lalu 613,550 tauka 50.25 persin nya, orang indu.
Ba PRU14 ke sekali tu, BN Sarawak mantaika nyauka setengah, iya nya 15 ari 31 chalun nya, mua/orang baru ke digulai enggau chalun lama sereta ke bisi peneleba.
Mayuh ari chalun nya, naka kediatu deka nyatup parti penyakal ke sama bisi ati deka bediri ba penuduk ke dipilih sida iya.
Naka diatu, Parlimen Sibu dipelabaka entara penuduk ‘angat’ laban beratika kerusi nya diperebutka ulih empat chalun alai BN di ari ulih Andrew Wong ngena tikit SUPP-BN, nyatupka penyandang Oscar Wong ari Parti Tindakan Demokratik (DAP) kelompah ari dua iku agi chalun ke bisi ati enggau bediri di sitak nya, Tiong Ing Tung (Parti Reformasi Negeri-STAR) enggau Jamie Tiew Yew Huong (Sarawak Peace Party-SPP).
Kelimpah ari Sibu, Parlimen Puncak Borneo mega, naka kediatu deka beratika penuduk nya diperebutka ulih empat iku chalun, iya nya BN di ari ulih mua baru, Jeannoth Sinel ke nganti penyandang penuduk nya Datuk Seri James Dawos Mamit.
Jeannoth deka nyatup Willie Mongin ari Parti Keadilan Rakyat ( PKR) kelimpah ari dua iku chalun bukai, Dr Bego Sepop ari Parti Bansa Dayak Sarawak Baru (PBDSB)enggau Buln Ribos (STAR).
Ba pekara bekait enggau PRU14 tu mega, 15 penuduk di Parlimen Sarawak deka beratika penuduk nya diperebutka ulih tiga iku chalun, lalu 13 penuduk (diperebut ulih 2 iku chalun) lalu naka ke diatu, semina beratika siku aja chalun BN ke udah dipadah deka bediri di sitak iya empu, Datuk Joseph Salang Gandum ti mega nyadi penyandang penuduk nya (nadai orang tauka parti naka kediatu deka nyatup iya).
Sebaka enggau pengawa bepilih besai bukai sebedau tu, Sarawak mega enda ulih nyeliahka sekeda penuduk ‘angat’ ke deka besatup enggau penyakal lalu entara ke pengabis terang endar, di Parlimen Stampin, lebuh penuduk nya diperebutka ulih kededua ketuai pemesai parti.
Stampin mega entara penuduk ke diperatika penuduk nya napi pemar lebuh BN mantaika chalun sida iya, Presiden Parti Sa’ati Rayat Sarawak (SUPP) Datuk Dr Sim Kui Hian deka nyatup chairman DAP Chong Chieng Jen, lalu enti nitih Chong penyandang ke penuduk Parlimen Bandar Kuching.
Taja pia, Chong ngambi pemutus meri penuduk nya ke disema kubu tegap DAP, iya nya Bandar Kuching ngagai chalun biak sida iya, ti meganyadi Pembantu Khas Chong, iya nya Dr Kelvin Yii lalu iya empu deka bediri di penuduk Stampin, alai penuduk nya diatu, dipadah ‘sitak kelabu’ DAP.
Di penuduk Dayak, mayuh ke beratika penuduk Parlimen Selangau ke nyadi penuduk lama (tradisi) ke Parti Rakyat Sarawak (PRS), alai ke sekali tu, PRS mantaika mua baru, Rita Insol, ti mega nyadi indu Dayak ke mungkal pengawa bediri minta pilih.
Sebedau tu, Parlimen Selangau disandang ulih Datuk Joseph Entulu ti kala nyadi Sapit Presiden PRS tang iya ditingkilka berindik ari pengawa iya dibuai ari parti bedau lama tu tadi ketegal enda nitihka atur sereta undang-undang parti nya.
Penyarut ke nyadi dalam parti nya, sereta pengawa parti ke mantaika mua baru di Selangau, meri peluang ngagai piak penyakal, iya nya Pakatan Harapan (PH), alai sida iya mantaika chalun Chairman Parti Keadilan Rakyat (PKR), Baru Bian nyadi chalun nyatup Rita enggau siku agi chalun, Sylvia John ari PBDSB.
Taja pia, sebedau tu, Kepala Menteri ti mega nyadi Chairman BN Menua, Datuk Patinggi Abang Johari Tun Openg sebedau tu nagit 28 tauka 29 penuduk deka dimenang ulih BN maya PRU14 tu ila, kelebih agi ngerampas penuduk ke ngembuan pengabis mayuh pengundi China.
Entara tiga penuduk ke bisi peluang sereta dikarap ulih dirampas pulai baru ulih BN, Parlimen Sarikei, Stampin enggau Miri.
Bepelasarka pekara nya, BN Sarawak udah mantaika chalun Kaban Kunsil Nengeri (ADUN)ke sitak nya baruh Parlimen nya, laban sida iya udah bisi sukung di pun menua.
Di Parlimen Stampin, BN mantaika Dr Sim nyadi chalun ti mega, kediatu mangku pengawa nyadi ADUN Batu Kawa, lalu di Parlimen Sarikei, ADUN Repok Dato Sri Huang Tiong Sii dipilih nyadi chalun lalu di Miri, Datuk Sebastian Ting ti mega kediatu mangku pengawa nyadi ADUN Piasau.