Diterima tauka enda dilempai ba peranak Selangau, ku Baru
KUCHING: Chalun Pakatan Harapan sitak Selangau Baru Bian pechaya pengundi di Selangau ke sekali tu, kelebih agi maya Pengawa Bepilih Besai ke-14 (PRU14) deka angkat ari penemu politik bansa tauka seraban orang.
Ke batang ku Baru, pengundi Selangau patut ngambi peluang tu mandang ngagai presiden Parti Rakyat Sarawak (PRS) Tan Sri Datuk Amar Dr James Jemut Masing, penemu iya salah lebuh madahka Orang Ulu enda ulih mujur ba penuduk ke mayuh Iban.
“Aku diterima tauka enda di Selangau, nya penemu pengundi Selangau mutuska pekara nya, ukai James Masing,” ku iya madah nengah siti penerang ditu, kemari.
Masing, lebuh nimbal pemutus Baru ke deka bediri di Selangau bedau lama tu tadi, munyi ke ngeleseika peluang Baru ke deka ngerampas penuduk nya ari PRS, lalu nanya, bakani ku penemu iya ulih mujur ba penuduk ke mayuh Iban, lebuh iya empu enda mujur bediri ba sitak genturng pendiau iya empu ke sebansa enggau iya empu (Lun Bawangs)maya PRU13 tu suba.
Nyaut timbal nya, Baru madahka: “Aku bediri di Limbang maya PRU13 lalu ukai ba ‘entara orang ke sebansa enggau aku (enti nya ke dikumbai Masing, Lun Bawang) tang pupu bansa ke bechampur Melayu, Kedayan, Iban, China enggau beratus aja bansa Lun Bawang.
“Nya pekara ke udah. Tu PRU14, enggau pekara baru ke mayuh bekait enggau ekonomi rama baru sereta penemu politik mensia mayuh. Aku ngarapka kitai bejali nyingkang nyeliahka pekara bekait enggau bansa sereta politik komunal, lalu peda chalun ke ulih dika- rapka, professional sereta siku orang ke berani, ke ulih bejaku ke rayat, ukai YB ke bisu ke semina tetenjik nitihka parti,” ku iya.
Baru nandu baru madahka iya semina ngemenuhka peminta ari mensia mayuh ke diau dia, ke minta iya bediri di sitak Selangau, nya alai ku iya, ngelakka pengundi mutuska sapa ke diterima di Selangau.
“Taja pia, aku beterima kasih ngagai James Masing ke ngelaluka aku bediri di Selangau. Tentu meh, menua tu sebuah menua demokrasi, ke ulih alai sapa-sapa ke deka bediri nitihka peneka ati orang nya empu,” ku iya.
Sitak Selangor nyangka deka beratika pengawa bepilih parlimen di sitak nya, deka diperebutka ulih chalun, nyengkaum penyandang Kaban Parlimen tiga penggal, Datuk Joseph Entulu ke enda dipilih, bisi didinga berita madahka iya deka bediri ngatika diri (Bebas).
Sebuah komiti khas ti ditumbuhka ulih Parti Rakyat Sarawak (PRS) hari Minggu tu tadi, muai Entulu sereta empat kaban besai bukai ketegal enda ngasi ke jaku parti ketegal list nama chalun ke PRU14, sereta kenu ngenyaika nama parti.
Sida bukai ke sama kena buai ari parti nya, Datuk William Nyallau Badak (penyandang Lubok Antu), Nyempah Sabot, Edward Kurik enggau Adriana Chumang Nyambong.
Masing madah kelebih agi dua iku pemesai ke kena buai, Entulu enggau Nyallau nadai hak minta pilih nyadi chalun PRS baru tauka ngarika parti nya.
Barisan Nasional (BN) udah nganti penuduk nya enggau chalun baru, iya nya siku luyar, kaban PRS, Rita Insol ngetanka kerusi nya.