JPM ngungkupka RM1 juta dikena ngaga RSC keterubah di Belaga enggau Kapit
BINTULU: Perintah udah nyendiaka mayuh perengka guna ke ulih dikena bemacham ijinsi Perintah, swasta enggau NGO ngaga program sereta pengawa sida iya di sitak menua pesisir nambah sosio-ekonomi mensia mayuh di sitak nya.
Kaban Kunsil Nengeri ( ADUN) N. 66 Murum, Kennedy Chuk Pai Ugon madah sida tu enda ibuh agi nurun ke pasar ngulihka servis Perintah laban servis nya deka dibai ngagai menua pesisir ninting maya.
Nya alai ku iya, komuniti di sitak nya tau ngelawa palan servis nya barang maya.
“Mensia mayuh enda ibuh mansutka duit enti sida iya deka ngulihka servis Perintah laban barang maya servis Perintah nya datai ba kaki tangga sida iya empu,” ku Chuk Pai.
Iya madah munyi nya lebuh bejaku ba atur pengawa Nutup Program Pemesai Begulai enggau Rayat sereta Program Ngenegapka Komuniti beserimbai enggau atur pengawa muka Palan Servis Menua Pesisir (Rural Service Centre tauka RSC) di Uma Pait Awan Long Urun, Belaga kena hari Empat minggu nyin tadi.
Palan RSC digaga ulih Unit Penyelarasan Pelaksanaan (ICU) Opis Menteri Besai ke digaga enggau ungkup RM1 juta, lalu nyadi pemungkal iya digaga di Pelilih Menua Belaga enggau Kapit, ke digaga baruh Program Khas Bumiputera (PKB) Sarawak, ti mega nyadi siti ari pungkal pengawa Program Tranformasi Perintah.
Chuk Pai madah palan nya nyendiaka endur sereta perengka guna kena bemacham opis sereta ijinsi Perintah, Swasta enggau NGO ngaga bemacham program sereta pengawa pemansang modal mensia di Opis Pelilih Menua Belaga, ngangkatka sosioekonomi mensia mayuh ke diau di sitak nya.
“Pemisi palan tu, rayat ari 14 buah genturung pendiau rumah panjai Penan enda ibuh agi nurun ke pasar ngulihka servis perintah laban servis ke diguna deka dibai ngagai RSC ninting maya. Mensia semina ngelawa RSC ngulihka servis ti bisi disediaka.
“Program bansa tu ngemuntangka penanggul mensia mayuh ke diau ditu. Pengawa bansa tu mega ulih neritka kaul entara komuniti enggau pengereja pengawa opis Perintah, alai rayat tau belajar sereta mereti agi ke proses sereta chara atur pengawa ke digaga ulih ijinsi Perintah, kelimpah ari pengereja pengawa opis Perintah ngelala sereta mereti agi ke penanggul ditapi ulih mensia mayuh ke diau di sitak tu,” ku iya.
Bekait enggay RSC, sebuah Tadika KEMAS mega ngena palan RSC ke deka nyendiaka servis pelajar tumu ke anak mit. “Bekait enggau pekara tu, aku ngelalau apai indai, anang ngelepaska peluang tu nganjung anak kitai ngulihka pelajar tumu ba palan tu,” ku iya.
Iya mega ngelalau semua piak ngambika majakka pemendar sida iya nyendiaka pemujur servis ngagai mensia mayuh ke diau di sitak nya taja pan betunga enggau bemacham empas ke pemerat ‘Merakyatkan Perkhidmatan Awam’.
“Aku ngelalau semua rayat ke diau ditu, kelebih agi sida ke diau di sitak Long Urun sama-sama nyaga Palan RSC tu, laban palan tu, kitai ke bempu begulai enggau rayat sereta Perintah.
“Kena perengka guna ditu enggau manah. Palan RSC tu deka nyadi kelai pemansang di Long Urun, ngambika kerejasama ke manah entara ijinsi perintah, swasta enggau rayat ditu ulih dipajakka,” ku iya.
Kelimpah ari palan RSC nya, sekeda projek baka sekula primari, pengawa ngaga bantu rumah (PBR), rumah tinggi (menara) enggau rangkaian telekomunikasi, Projek Bekal Elektrik Alternatif Menua Pesisir (SARES) / Projek Solar Hybrid (KKLW) udah digaga lalu sekeda projek bukai deka digaga di Long Urun, ku iya.
“Ditu kitai beratika bukti, pemendar, sereta komitmen perintah Barisan Nasional (BN) ngemansang, ngemanahka agi tikas pengelantang pendiau rayat di menua pesisir nyerumba ‘Membandarkan Luar Bandar’ kelebih agi di sitak Long Urun tu nengah Program Transformasi Menua Pesisir’,” ku iya.
Ba lansa bukai, iya minta sukung deka diberi ulih rayat di sitak nya ngagai chalun Kaban Parlimen (MP) P.216 Hulu Rajang maya Pengawa Bepilih Besai ke-14 (PRU14) ke deka digaga enda lama agi.
“Aram meh kitai bela meri sukung kitai ngagai chalun tu, ke dikelala kitai, Datuk Wilson Ugak Kumbong. Aku ngarap endar kitai semua deka terus meri mandat ngagai iya, ke pemujur, sereta pemaik, pemansang ke deka dipajakka di sitak kitai di Hulu Rajang,” ku iya.
Sama bisi nguluka atur pengawa nya, Pemangku Pegawai Pelilih Menua Belaga Juan Ubit, Pegawai ari Unit Perambu Menua (SPU) Awi Abang, Pegawai Opis Pengerijista Pengada enggau Pemati Menua (JPN) Sarawak, Slyvester Tausin, Temenggong Ajang Sirek, Pemanca Umek Jeno, Pemanca Tony Kulleh, Penghulu Luhat Anyub, Cr. Bete Lahang, Cr. Tirah Lawai, Cr. Abu Talib, Maren Uma (MU) Eric William Usang, MU Asmidy Agau, MU Pait Awan, ketuai komuniti enggau pupu bansa, ketuai opis perintah enggau pengari ijinsi Perintah sereta swasta.