Peranak Selangau dilalau enda milih chalun ari luar: Masing Sida semina deka minta undi aja lalu enda meretika pinta sereta peneka peranak asal ke nguan tetiap bengkah menua
KUCHING: Presiden Parti Rakyat Sarawak (PRS) Tan Sri James Masing ngelalau peranak di Selangau nulak chalun luar ti minta pilih ba sitak parlimen nya.
Ku iya, orang luar enda mereti pinta enggau peneka peranak asal ke nguan tetiap bengkah menua.
“Chalun ari menua bukai ke ukai peranak asal menua tu enda ngelala sapa kitak ke nguan menua tu.
“Sida semina deka bediri ketegal ti deka minta pilih aja.
“Ketegal nya anang masau undi kita ba orang ke enda dikelala,”ku Masing ba pengawa bejadi Jentera Bepilih P. 214 Selangau ke diatur di Rh William di Selangau kemari.
Iya ke mega Sapit Kepala Menteri nyemakka chalun Pakatan Harapan( PH) ke mega Chairman Parti Keadilan Rakyat(PKR) Baru Bian ti mutus deka bediri minta pilih di Selangau ke majoriti pengundi bansa Iban.
Baru ke asal ari Ba’kelalan bebansa Lun Bawang kala bediri minta pilih di sitak parlimen Limbang ba PRU13 tang alah ngelaban chalun Barisan Nasional( BN) Hasbi Habibolah.
“Iya semina orang politik ti nadai ngembuan pengeransing meri servis ngagai rayat ditu,”ku Masing nambah.
Ngenang sentang chalun baru PRS, Masing madah Rita sigi peranak asal Selangau lalu meretika daya pengidup sereta adat menua nya.
“Udah nyadi tanggungpengawa kita semua ke nyadi pengundi di Selangau milih iya nyadi pengari kita di parlimen.
“Rita meretika pinta enggau peneka kita ditu,”Ku Masing.
Kelimpah ari nya Masing madah Selangau ngerikod sejarah baru ba pengawa bepilih pengudah Rita nyadi orang indu bansa Dayak keterubah dipilih bediri ba parlimen di Sarawak.
“Nengah pengawa ngundi iya, kita udah milih orang indu Dayak keterubah nyadi orang ngaga undang-undang di Malaysia,”ku Masing.
Bela datai Ketuai Orang Indu PRS Dato Sri Doris Brodie, raban ketuai renggat tinggi PRS, raban penghulu, tuai rumah enggau orang bukai.
Chalun ari menua bukai ke ukai peranak asal menua tu enda ngelala sapa kitak ke nguan menua tu. Tan Sri James Masing Presiden Parti Rakyat Sarawak (PRS)