Tiong chalun ti engkeman ngarika BN di Parlimen Bintulu
BINTULU: Chalun Barisan Nasional ( BN) iya nya penyandang penuduk Parlimen P217 Bintulu Datuk Seri Tiong King Sing nyadi chalun pemadu patut ngenanka penuduk nya maya Pengawa Bepilih Besai Ke-14(PRU14) tu.
Sekretari Parti Pesaka Bumiputera Bersatu (PBB) Pampang Jepak, Shamsuddin Abd Razak madah, pengelama beberapa penggal udah nyadi pengari rayat, penau nyadi ketuai endang nyata dipeda laban udah mayuh jasa enggau mantu rayat.
Ku iya, Tiong berani bejaku sekalika ba Parlimen tauka di luar Parlimen, gawa negi sereta ngintu nasit rayat kelimpah mayuh pemansang udah dibai iya kelebih agi di Bagi Menua Bintulu baka Sepital Bintulu ke baru, Poliklinik Bintulu, Jejantas, sistem parit dikena mutarka bah tunggal enggau ke bukai.
“Iya siku ketuai kemerah, sedia mendingka peminta rayat lalu gerah dibai berandau mutarka sekeda penanggul sereta chukup siru, seruran ngaul diri semak enggau rayat, bejalai gawa ngagai renggat baruh nadai ngira jam betemu enggau rayat di mengeri tauka di menua pesisir,” ku iya madah ngagai Utusan Borneo lebuhka dipinta ngelansa pasal pengulih enggau peluang chalun nya maya PRU14.
“Aku meri pengaga ati ngagai YB Datuk Seri Tiong laban dichalun ngenanka penuduk sitak Parlimen P217 Bintulu,” ku iya.
Ku iya, naka diatu Tiong nyadi chalun pemadu patut ngenanka penuduk nya lalu aku minta semua pengundi di sitak Parlimen P217 Bintulu nurun ngundi bebala mayuh.
“Aku ngarapka chalun BN tu ulih dipilih baru enggau bulih majoriti undi ti mayuh agi maya PRU14 sekali tu. Beri iya peluang sekali agi ngenanka penuduk Parli- men P217 Bintulu ngarika BN ari Sarawak,” ku iya.
Ngelansa pasal sukung renggat baruh ku iya, sida deka nyukung BN lalu semina sekeda aja enda puas ati nyangka deka nyukung penyakal.
Bekaul enggau napi parti penyakal ku iya, ditu nadai entu berat laban pengulih Tiong menang majoriti besai endang lantang amat.
“Tang Tiong patut gawa bebendar agi ngambi ati rayat di kandang mengeri ti endang ditemu nyadi menua pengundi ti mar dikaul BN,” ku iya.
Berebak enggau nya, Ketuai Nembiak PBB Pampang N67 Jepak Jefferi Johari madahka chalun BN Datuk Seri Tiong ulih menang maya PRU14 sekali tu belalauka pengulih chalun nya empu ti udah bejalaika tanggungpengawa enggau manah mantu rayat di sitak nya taja bemacham isu deka dibai penyakal ila.
“Chalun BN ke lalu nyadi Presiden Parti Demoratik Progresif (PDP) tentu ulih menang taja bepadan enggau dua tauka tiga penyuru di sitak Parlimen Bintulu.
“Mayuh jasa udah ditabur chalun tu di sitak pegai iya lalu kami raban PBB deka meri sukung tegut ngagai iya belalauka semangat kerejasama antara komponen parti BN,” ku iya.
Ngenang pasal isu nyangka dibai penyakal ditu ku iya, pekara ti didinga aku iya nya bekaul enggau isu 1MDB, Chukai Barang enggau Servis (GST) enggau ungkus belanja idup.
Taja pia ku iya, nyadi Ketuai Nembiak PBB Jepak, iya deka ngenegapka agi raban gawa ba semua ranting nembiak PBB Jepak enggau raban nembiak di Bintulu ngambi nyukung tegut BN.
“Ngagai rayat di renggat baruh, kami deka nentuka raban nembiak seruran semak enggau BN sereta enda tepawah runding mendingka jaku penyakal,” ku iya.