Penyakal, BN sebaka peluang tau menang ba sitak Selangau
KUCHING: Penganalisis Politik Assoc Prof Awang Azman Awang Pawi madahka Selangau nya penuduk angat laban meri kededua gempung, Barisan Nasional (BN) enggau penyakal peluang 50-50 menang dia maya Pengawa Bepilih Besai Ke-14 (PRU14) kena 9 Mei tu.
Chairman Parti Keadilan Rakyat (PKR) Nengeri, Baru Bian ke mega Kaban Kunsil Nengeri (ADUN) Ba’ Kelalan ukai semina betapi enggau raban pengawa bepilih BN aja, tang mega engka chalun ngatika diri, penyandang MP Datuk Joseph Entulu Belaun.
Awang Azman madah iya pechaya Entulu, Menteri ba Opis Menteri Besai agi bisi kering sukung di Selangau taja iya ditingkil kena Hari Minggu nyin tadi ari komponen BN, Parti Rakyat Sarawak (PRS), ke alai iya mega sapit presiden.
Taja pia, Entulu bedau ngaga penetap diri. Bala bepelajar pechaya Entulu engka enggai lenyau status BN ari pengawa bediri nyadi chalun ngatika diri maya pengawa bepilih parlimen tu laban iya engka bisi penemu deka nyakap kebuah iya ditingkil ari PRS.
Sekeda pechaya pengawa ningkilka iya agi nyadi tanda tanya nyentuk ke Opis Pengerejista Gerempung (ROS) tauka Kort ngaga jaku pemutus.
“PKR bisi peluang ngelaban enggau menang enti sema berebut tiga penyuru enggau nyema Datuk Joseph Entulu bela enggau berebut di Selangau. Iya (Entulu) patut bediri nyadi chalun BN, pemujur pulai ngagai iya tauka BN tang tu diatu akademik,” ku penemu Awang Azman.
Baru, bansa Lun Bawang mega beambi ulih ari penyarut tang mega ngena memanah peluang ari penyarut dalam PRS tauka BN ke diatu, ba penuduk ke tebal bansa Iban di Selangau, ku iya.
“Taja iya nemua pekara politik nyata dia diatu, PKR enggau Baru engka berundingka sida patut anang masau sebarang peluang ke bisi,” ku iya seraya nambah ke alai Baru, digelar luyar tanah Adat Bansa Asal (NCR), mega deka beambi ulih ba isu tanah NCR di sitak nya.
Baru engka tau ngena mayuh isu ba pengurang pemansang infrastruktur enggau pengawa puang taja pan naka diatu, pengundi dia betaun pengelama udah mindah ke mengeri enggau pasar besai ba kimpin iya ila, ku Awang Azman.
Naka ke diatu semua orang nemu Baru deka berebut enggau orang baru BN ba penyanding penemu undang-undang korporat, Rita Sarimah Insol. Rita, 57 taun, iya nya nyadi chalun indu keterubah disabung PRS.
Tang penyampau ke amat sida ti bediri minta pilih semina deka ditentuka maya hari ngantung nama kena Hari Enam tu (sehari tu).
Ba pengawa bepilih parlimen nyin tadi, Entulu bediri nengah tikit PRS-BN menang manah ngalahka chalun ari Sarawak Workers Party (SWP) Datuk Sng Chee Hua enggau Joshua Jabeng ari PKR.
Entulu teulihka 12, 040 undi lalu Sng (4,485) enggau Joshua (3,891).