Pengelantang nembiak sekula seruran dikemeratka perintah
SARIKEI: Perintah Sarawak seruran siru sereta beratka pengelantang rayat, kelebih agi nembiak sekula.
Kaban Kunsil Nengeri (ADUN), Repok, Dato Sri Huang Tiong Sii madahka perintah nengah Yayasan Sarawak, udah ngatur sekda program dikena mantu raban tu baka ngatur Program Bantu Gari Sekula.
“Program tu dikena mantu nembiak ti patut datai ari ruang bilik seranta ngulihka gari sekula dikena ngelempungka tating belanja ditapi apai indai nyediaka kereban sekula bala anak sida ti be- sekula.
“Nengah bantu tu kitai ngarap ulih meri peransang belajar ngagai sida ngambika bebendar agi nyapai penyulut ba pelajar,” ku iya.
Huang mansutka jaku tu lebuh Pengawa Nyuaka Gari Sekula di Sekula Sekondari (SMK) Sungai Paoh Sarikei, ensana.
Beserimbai enggau pengawa tu sepenyampau 230 iku nembiak udah nerima bantu tu.
Nitih ku Huang, pengawa enggau chara dipejalai Yayasan Sarawak, bejalaika program mantu, endang patut dipuji. Ku iya, pengawa tu udah nyaup apai indan nentuka bala nembiak nerima pelajar nitihka pematut, ngambika enda tinggal ba pelajar, ketegal ditekul penyeranta.
“Berebak enggau nya, kitai ngarapka program ke bansa tu deka ditampung dudi hari nentusia raban napi penanggul nerima perati nitihka pematut,” ku iya nandu.
Sama bisi datai Sapit Residen Bagi Menua Sarikei, Abang Mohd Porkan enggau Prinsipal SMK Sg. Paoh Paul Law Nai Kung.